隨住習近平穩坐中國紅色江山，其夫人彭麗媛喺官場中嘅存在亦日益明顯。消息指，彭麗媛疑似擔任中央軍委幹部考評委員，負責「選人用人」，掌握軍隊人事大權。

《星島日報》5日報道，自從彭麗媛2017年卸下解放軍藝術學院院長嘅職務後，在軍隊職務不詳。但近日，社交媒體上流傳佢參加中國軍隊活動嘅相，並附有說明：「中央軍委幹部考評委員會專職委員彭麗媛來校調研高層次人才隊伍建設。」不過該報道亦表示，對於網傳資訊，有網友表示可信度待查。

據百度百科顯示，彭麗媛1962年11月20日出生於山東省菏澤市鄆城縣，係著名軍隊歌唱家，中國第一位民族聲樂碩士，國家一級演員，少將軍銜，曾任總政歌舞團團長、解放軍藝術學院院長。連續當選第八屆、九屆、十屆中國人民政治協商會議全國政協委員。而喺軍隊體制改革後，軍藝併入國防大學，佢卸任院長。

台灣《中央社》報道指出，中央軍委幹部考評委員會自2016年成立，目的係要全面落實軍委主席負責制，官方介紹稱：「全面深入貫徹軍委主席負責制，確保精準科學選人用人的重要舉措，是適應領導指揮體制改革，提升選人用人公信度、權威性的新探索。」

近年以來，官方頻頻高調宣傳彭麗媛視察行程。2021年10月26號，中美合作嘅天津茱莉亞學院正式落成，彭麗媛發去賀信。李鴻忠主政嘅天津喺幾日之後就迅速舉辦咗「學習彭麗媛教授賀信精神、做好天津對美人文交流工作研討會」，大讚彭麗媛嘅賀信為「新形勢下」進行對美國嘅人文交流「指明方向」。呢次係官方首次讚揚「彭麗媛精神」，並且將一向只用喺習近平身上嘅「指明方向」嘅說法，套用喺彭麗媛身上。

去年6月，彭麗媛以聯合國教科文組織促進女童同婦女教育特使身份，向中非婦女論壇透過影片致詞時講到，「這些年，我接觸了很多非洲女性，他們熱情勇敢，自強不息，令我印象深刻」

去年11月，彭麗媛出席咗中國前總理李克強嘅喪禮，行喺人群前面。相比之下，喺前總理李鵬同中共第三代領導人江澤民嘅告別儀式上，彭麗媛就冇同習近平一齊去弔唁。今年2月24日，彭麗媛更加破天荒單獨舉行外交活動，喺北京會見咗烏茲別克斯坦總統夫人。《I》