一向靠攏當局嘅商界，近排越來越多人好似食咗誠實豆沙包咁，直言不諱批評依家當局口中所謂「由治及興」嘅局面。恒隆集團董事長陳啟宗直言，香港1997年前經濟興旺情况已不可持續，港人不應「活在歷史輝煌」。又話見到部分港府委員會成員後「一行眼淚」，指唔能夠期望「果班人」有咩新見地。

《明報》今（25日）報道，香港發展論壇昨日舉辦主題為「拼經濟，如何拼？」研討會。身兼香港發展論壇召集人嘅陳啟宗喺致辭時表示，香港1997年前經濟興旺情况已不可持續，呼籲港人唔應該再「活在歷史輝煌」。加上疫情、社會動盪、中美關係唔好、香港依賴樓市等問題，香港要諗新經濟嘅出路。同時，研討會度各位與會者就人口老化、香港而家嘅優勢同埋將來發展方向開始熱烈討論，場面曾一度充滿「火藥味」。

港大首席副校長王于漸表示，香港人口老化問題愈來愈嚴重，但政府至今未有解決呢個結構性問題嘅相關措施，所以好難發展新經濟範疇。參與討論嘅香港發展論壇理事張志剛問點樣具體增加人口，王于漸講吸引移民、放寬入境係其中一個辦法，特別係年輕一代。不過，張志剛話王嘅諗法邏輯上係有道理，但最大問題係冇太多人肯嚟，佢舉例指來港讀書嘅內地學生中，只有少數願意喺港工作。

同時，恒基執董同埋首席財務總監馮孝忠亦參與討論，佢話「我都想『挑吓機』，校長（王于漸）」，認為外地人來港難以擺脫從事金融、IT等行業先能「搵夠租」，有才能嘅人喺香港如果唔係呢啲行業就冇法留低。

王于漸回應話雖然人口政策好複雜，但仍然要先制定具體目標，然後自然有相關配套，最緊要有確實嘅行動，「香港人把聲來來去去都嗰幾把聲」，唔係馮孝忠就係陳啟宗；講咗好耐都冇人聽，因為我哋都只係呢度講下而已。」

陳啟宗表示，香港有低稅率、法制、資訊自由度較內地其他城市高嘅優勢，所以香港同內地要討論邊度需要融合、邊度要保持兩制，民間同政府要互相配合尋找新出路。佢提到，睇到部分香港政府委員會嘅成員，睇完之後「一行眼淚」，「真係好難睇到嗰班人有咩嘢新見地。」

金融學院前行政總裁郭國全認為，應該增加更多年輕人對香港嘅決策有影響力，「你真係搵啲年輕人問佢哋心目中嘅香港，可能唔係我哋心目中（嘅樣子）。」《I》