美國情報機構正編寫一份揭露北京領導高層腐敗同隱藏財富嘅報告，預計今年底前完成並公佈。報告目標包括習近平在內嘅七名中共政治局常委、25名政治局委員205名中央委員會委員，仲有29個省級黨委書記。

去年12月，美國總統拜登簽署長達1千幾頁嘅《2023財年國防授權法案》，其中第6501條要求中情局整理更多關於中共領導層嘅財富同腐敗活動，美國國家情報總監海恩斯（Avril Haines）同國務卿布林肯（Antony Blinken）要共同完成呢份非機密報告，並於今年12月22日前向美國公眾公開。

去年，美國參議員盧比奧（Marco Rubio）要求喺《年度國防授權法案》中，添加呢項要求。

美國《華盛頓時報》（The Washington Times）10日報道，美國情報機構正在撰寫呢份報告，預計將於今年12月22日前揭露中國共產黨領導人嘅廣泛腐敗和隱藏財富。美國國家情報總監辦公室發言人索恩（Angela Sohn）表示，該報告嘅編寫工作正在進行中。

《自由亞洲電台》報道，出逃中國、獲得澳洲政治庇護嘅前中國駐悉尼總領館一等秘書陳用林表示，美國由科技到各個層面都有能力收集中共高層秘密，而「中共從上到下沒有一個官員不腐敗的，習近平本身就是最大的腐敗典型。」

陳用林分析，習近平上台後選擇性反腐，雖然反腐動作頻頻，但實為清除異已。佢更指出，由鄧小平以嚟，中紀委密室檔案就有各個官員嘅腐敗資料，「來拿捏各級官員」。

陳用林認為，中方當然會忌憚美國公開其內部貪腐資料，過去包括中國知名博主「編程隨想」等揭露中共腐敗嘅人士都遭報復。因為咁做會直接撕破中共偽裝，讓中共執政合法性破產，佢預料中方屆時肯定會誣賴美方報告係捏造。

法國時評人、獨立電影人王龍蒙則認為，報告一旦發表，將對中共產生「核彈級」衝擊力，因為當中國老百姓睇到中共腐敗真相後，中共維持統治合法性嘅手段會全部失靈，而巨大嘅社會離心力有可能危及中共統治。

王龍蒙預料，中方到時可能會再擺出濫招，斥責美國干涉中國內政。佢認為，中共已經透過「一帶一路」喺全球範圍內輸出其腐敗模式，呼籲全球正視此問題。

其實呢份報告都唔會係外界第一次獲悉中共腐敗內幕，2012年10月，《紐約時報》就曾報道中國前總理溫家寶家族成員，在佢任內撈取至少27億美元嘅巨額財富，中國駐美大使館曾試圖阻止該報道發出。《I》