短視頻平台TikTok一直被懷疑將海外用戶資料回傳中國，如今有超過10名前員工受訪時表示TikTok運作同母公司交纏不清，甚至有數據專家爆料TikTok每14日就會將美國用戶嘅個人資料傳送回北京，再度引發外界對TikTok嘅懷疑。

美國眾議院喺三月中時通過法案，要求TikTok同中國母公司字節跳動（ByteDance）斷絕關係，否則將會喺美國禁用TikTok。

TikTok CEO周受資今年初向美國國會議員表示，TikTok已經削減同中國母公司字節跳動嘅聯繫，一再否認有任何不法行為，但美國《財星》雜誌（FORTUNE）最近訪問咗11位前員工，證實TikTok同佢嘅母公司係密不可分嘅，同埋佢地所聲稱獨立於中國之外嘅說法係假象。其中有位前高級數據專員指出，TikTok大約每14日就會向北京母公司傳送數十萬美國用戶嘅個人資料。

2022年任職TikTok高級數據專員嘅Evan Turner表示，雖然公司聲稱美國用戶嘅資料，淨係會喺美國保存，但人資代表喺線上會議中透露，TikTok實際上依然會同母公司「字節跳動」合作，「呢種秘密嘅指揮鏈同TikTok主管所講嘅獨立說法好矛盾」。

Evan Turner更指出，佢同北京主管每星期都會開例行檢查會議，匯報佢嘅工作進度，但整個2022年，大約每隔14日就會向母公司字節跳動傳送填滿數十萬美國用戶資料嘅電子表格，「呢啲數據包括TikTok美國用戶嘅姓名、電子郵件地址、IP地址以及地理、人口統計資訊」。

對於呢啲情況，約翰霍普金斯大學資訊安全研究所主任Anton Dahbura認為，數據傳去中國「非常令人擔憂」，即使個人資料淨係佔TikTok收集嘅資訊一小部分，但可能好有針對性，例如地理數據就可以用嚟進行釣魚攻擊，對某啲人造成嚴重損害。

另外曾經喺TikTok做過安全工程技術經理嘅Patrick Spaulding Ryan同另一位前員工亦提到，一啲內部軟件系統，都係由中國字節跳動團隊維護同監控，包括內部即時通訊平台「Lark」。佢哋表示：「由於Lark係由字節跳動營運，所以中國員工可以睇到美國員工嘅討論，包括關於美國用戶資料嘅討論」。

Ryan亦提及美國TikTok同字節跳動共享手機驗證軟件同VPN網路「Seal」，員工被要求喺佢地嘅工作手機上下載呢款應用程式嚟保護身份、數據同減低風險，但員工用嘅係私人手機，「令佢地容易受到中國字節跳動員工嘅監視」，「美國TikTok員工對呢個軟件係『完全唔知情』，冇人知道佢點樣運作」。

而《財星》雜誌指出，今次訪談中提及嘅密切聯繫狀況，引發關於美國TikTok同中國字節跳動之間關係嘅更多問題，亦為擔心中國政府可能利用TikTok作為間諜手段、篩選收集嚟嘅大量數據嚟監視美國人嘅批評者，提供更多論據。《I》