中國地方債務問題嚴重，有地方官員竟然直接話「債是不可能還了」，被中國學者諷刺為「無賴化」管理，形容係「地方上最大老賴」。

中國去年容許地方政府發行「特殊再融資債券」，透過「借新還舊」，延長債券贖回嘅期限以避免地方債務爆雷。不過，武漢大學學者調查研究發現，有地方政府欠債唔還，逐漸成咗當地最大嘅賴帳「老賴」，呢種信用透支治理「無賴化」，將撕裂用嚟維繫社會治理秩序嘅基本信任體系。

《南華早報》報道，「網易」上月刊登武漢大學政治與公共管理學院副教授馮川嘅文章〈地方治理信用透支已成常態，政府成當地最大『老賴』〉，馮川專門研究中國農村社會同基層治理。佢指出，中國地方治理嘅信任危機已層層蔓延到鄉村，首先係縣政府失信於銀行、企業同鄉鎮政府，接著鄉鎮政府再失信於鄉鎮幹部、村幹部同工程隊，然後村幹部又失信於工程隊、村民，村民亦對基層幹部失去信任。

縣政府對銀行嘅失信表現係「只還利息不還本」，例如貴州省某縣長拚政績大推公共建設，明明土地財政僅1億元（人民幣，下同），竟負債80億元，且每年要還利息1億至2億元不等，但該名縣長仍大言不慚話：「債是不可能還了，銀行只能要利息，否則連利息都不給」。

《路透社》去年8月曾引述國際貨幣基金（IMF）嘅數據，指中國地方政府債務喺2022年增至92萬億元，佔經濟產出嘅76%，高於2019年嘅62.2%。

除此之外，若干縣政府因撐唔住巨額財政缺口，甚至藉由「暗槓」鄉鎮收入嚟減輕財政壓力，例如山東某縣截留拖欠本應還畀鄉鎮嘅稅收，導致分別欠下兩個鎮6000萬元同1.1億元；仲有啲鄉鎮幹部為爭取表現，居然挪用下屬工資嚟興辦亮點工程，一名鄉鎮公務員曾抱怨啱啱番工冇幾耐，全縣各鄉鎮就停發績效工資，每月拿到嘅薪酬唔到3000元。

馮川嘅研究報告仲提到，陝西省某村2017年闢建咗1座廣場同4條排水道，共花費200多萬元，但專案資金只撥下40萬，村支書自己墊付20多萬，其餘部分由施工單位墊付，而家仲欠施工方27萬，偏偏民眾唔信任村級幹部，懷疑佢哋以權謀私，令村幹部陷入「流汗又流淚」嘅兩頭唔到岸困局。

馮川話：「如今，種種『無賴化』行為正在地方治理中呈現系統性蔓延之勢，一個可以稱為『信用透支型治理』的生態系似已廣泛形成」。佢表示，信用透支浮現基層治理各個層面，撕裂維繫社會治理秩序嘅基本信任體系，足以消滅包括德治、法治同自治在內一切有可能推動善治嘅力量，使社會治理落入距離治理體系同治理能力嘅現代化更遠方向。

地方政府負債嘅主要原因係好大喜功，或者係追求面子工程，例如威武嘅市鎮廣場或者奢華嘅建築等。喺馮川嘅訪談中，有一位縣長就直言，呢啲建設都係受政治壓力影響嘅，例如為咗美化當地嘅GDP等數字，唔可以比其他縣落後，咁先可以確保自己嘅政治前途。但代價就係呢啲縣長只會睇短期內嘅成就，唔會考慮長遠嘅後果。《I》