美國高調介入印度和中國之間嘅領土爭端，美國國務院周三（20日）公開確認阿魯納恰爾邦（Arunachal Pradesh），即中國稱之為藏南地區，屬於印度領土，中國外交部對此表示強烈不滿。印度外長蘇傑生（S. Jaishankar）就選擇喺同日公開批評，印度開國總理尼赫魯對華外交政策立場係一個「泡沫」，並質疑尼赫魯為何要反美。

美國國務院首席副發言人帕特爾（Vedant Patel）喺例行記者會上表示：「美國承認阿魯納恰爾邦係印度領土，強烈反對任何單方面企圖透過軍事或民事，入侵或侵犯實際控制線（Line of Actual Control）來推動領土嘅主張。」

事實上，美國認為阿魯納恰爾邦屬於印度領土呢個立場由來已久，翻查國會文件，提到自1962年中印戰爭之後，美國就承認麥克馬洪線（McMahon Line）為中國與印度各自控制領土嘅國際分界線，

中國外交部發言人林劍周四（21日）主持例行記者會時，對美方言論表示強烈不滿和堅決反對，佢說：「中印邊界從未劃定，藏南地區歷來是中國領土，這一基本事實不容否認。中印邊界問題是中印關係之間的事，與美方無關。眾所周知，美方一貫不擇手段地挑動利用他國的爭端，以服務其地緣政治私利。」

印度開通色拉隧道（Sela Tunnel），被視為升級實際控制範圍內基礎設施而採取嘅行動。印度外交部19日指，中國對藏南地區提出嘅主張荒謬 ，強調阿魯納恰爾邦永遠係印度不可分割嘅一部份。

與此同時，印度外交部長蘇傑生20日出席CNN-News18新聞台舉辦嘅「崛起巴拉特2024峰會」時 ，對印度早期喺尼赫魯領導下嘅外交政策方向做出咗批評。

蘇傑生表示，「呢個係我哋製造嘅泡沫。以前，好大程度上都係尼赫魯式嘅意識形態泡沫。尼赫魯反對美國，所以每個人都反對美國。尼赫魯話中國係好好嘅朋友，每個人都話中國係好好嘅朋友。即使而家都仲有個叫做『中印大同』（Chindia）嘅概念。」

蘇傑生提到，事實上印度首任副總理兼內政部長帕特爾（Sardar Patel）曾向尼赫魯提出要警惕中國、對中印關係並唔樂觀。帕特爾當時曾經話：「唔可以樂觀地睇待中國嘅意圖。我哋有好多嘢需要警惕」，

但尼赫魯對帕特爾嘅回應係「我無法想像有人會進行橫跨喜馬拉雅山嘅瘋狂冒險」，但係呢啲正係中國喺1962年做嘅事，即1962年發生嘅中印邊境戰爭。

蘇傑生續講，「我哋代表中國疏遠咗美國人。我哋為中國嘅事業奔走呼號，更加具有諷刺意味嘅係，喺20世紀50年代，我哋破壞咗同美國嘅關係，因為我哋在為中國爭辯。」佢強調，依家講呢啲並唔係「事後諸葛」，而係「把我哋稱之為冇走過嘅路嘅歷史情況，擺喺年輕一代面前」。

蘇傑生強調，尼赫魯嘅外交政策並唔係無可指責，「我哋需要擺脫邪教崇拜，即由1946年到而家，都係偉大嘅年代」，佢指出「（有一種認識）認為尼赫魯嘅外交政策係無懈可擊嘅神學，即使到而家，無論邊個上台執政都必須遵循，任何偏離都係錯誤嘅。公司畢竟要接受審計，國家亦應該接受審計，政策亦應該接受審計，必須以開放同埋批判嘅心態去看待過去。」

蘇傑生補充話，好樂意討論當下嘅對外政策，「如果有人講我想同你討論過去10年嘅情況，我亦都會好高興，我會非常樂意為我嘅記錄辯護。」《I》