美國印太司令部司令（John Aquilino）昨（20日）表示，所有跡象表明，解放軍正在滿足習近平主席下令喺2027年做好入侵台灣準備嘅指示，並正以二戰以來前所未見嘅規模建設軍事同核武庫。台灣防長邱國正日前亦稱，兩岸正處於40年來最嚴峻狀態，已經瀕臨中共對台灣動武嘅狀態。但最新民調顯示，台灣人似乎對此不屑一顧，50.4%嘅受訪者對此說法沒有同感。

阿基里諾向美國眾議院軍事委員會表示，即使北京面對經濟挑戰，佢哋嘅國防預算喺近幾年都仲有16%嘅增長，已經達到2230億美元以上。佢指出，喺佢入職嘅三年內，解放軍增加咗400多架戰鬥機同埋20多艘主要戰艦。佢都提到，自2020年以來，中國彈道同埋巡弋飛彈庫存都增加咗一倍。

阿基里諾表示：「所有嘅徵兆都顯示，解放軍係喺跟足習近平主席嘅指示，準備喺2027年入侵台灣。解放軍嘅行動顯示，如果有命令，佢哋有能力按照習近平嘅時間表，用武力統一台灣同中國大陸。」佢亦指出，中國軍方一直喺演練同台灣相關嘅各種任務，例如模擬海上同埋空中封鎖去包圍台灣。

3月7日，台灣國防部長邱國正，喺立法院外交國防委員會答覆國民黨立委賴士葆嘅問題時講到，兩岸情勢係近40年最嚴峻嘅狀態，佢話，「就軍方著眼來講，這已經瀕臨這這狀況，沒有改變，兩岸的狀況是很嚴峻的，我每天提心吊膽的….」賴士葆問：「晚上睡得好嗎？」邱國正講：「我睡得不好，它沒有什麼不能的，這我們制止不了。」

喺答覆國民黨立委羅智強嘅質詢時，邱國正亦都講到：「萬一擦槍走火的話，這個誰都不敢保證。」佢話，就好似台灣海巡署執法時，碰到中國船隻越界嘅情況就會加劇風險，「起了戰端並不意外」。

台灣民意基金會星期二（3月19日）公佈咗一份針對台灣自1月總統大選後，民眾對一啲重大議題嘅看法調查結果，其中一個議題就係對邱國正有關「中國對台動武」嘅民意反應。調查喺3月11至13號針對20歲以上成年人進行，共有1090份有效樣本，結果顯示，50.4%嘅人冇同感，37.1%嘅人有同感，仲有7.8%嘅人冇意見，4.8%嘅人唔知點答。

設計問卷並負責解讀調查結果和分析政治意涵嘅民意基金會董事長遊盈隆話，過半數台灣人對邱國正嘅講法「冇同感」，唔認為台灣正面對中國武力入侵嘅危機，呢個發現反映嘅訊息有啲微妙，即係「台灣社會大眾對台海情勢的認知和國防部長有很大的落差」，呢個落差或者係代表兩種可能性，一係「台灣社會對台海情勢懵懵懂懂」；另一可能係「邱國正誇大其詞」，至於邊個係真相，「是一個嚴肅的問題」。

而進一步分析政黨傾向後，遊盈隆表示：「不同政黨支持者多數都和邱國正沒有同感，不覺得中共即將對台動武，這是很奇特的現象。」佢話，民進黨支持者中有51%冇同感，39%有同感；國民黨支持者中有50%冇同感，40%有同感；民眾黨支持者中有59%冇同感，34%有同感；中立選民中有40%冇同感，36%有同感。《I》