北京當局近年高舉國家安全大旗，令唔少在華外國企業備受壓力，紛紛將風險管理視為企業首要任務，歐盟亦將中國視為「夥伴、競爭對手同系統性對手」歐洲商業遊說團體今（20日）警告，在華歐洲企業過於注重風險管理，而唔係增加市場份額，損害咗效率同創新，並增加消費者嘅成本。

路透社今日報道，歐州商會（European Chamber of Commerce）喺去風險報告中表示，由於新冠疫情、全球經濟放緩、俄烏戰爭同中美地緣政治競爭，企業「過度偏向風險管理和增強抵禦能力」。

中國歐州商會會長Jens Eskelund向記者表示，大約四分之三嘅商會成員喺過去一年中審視咗自己嘅供應鏈，其中21% 嘅成員將更多嘅生產線轉移到中國，12% 嘅成員將更多嘅生產線移出中國。

Eskelund話：「確保未來同歐洲建立可行嘅商業關係符合中國嘅理性自身利益。但坦白講，呢種關係目前面臨風險，我認為歐洲有可能被逼以更具保護性嘅方式做出反應。」

報道提到，歐盟委員會對中國電動車發起反補貼調查，以確定是否徵收關稅以保護歐盟生產商。調查預計將於 11 月結束，但歐盟有可能提早徵收臨時關稅。中國對此怒批歐盟搞「保護主義」。

Eskelund表示，電動車調查以及其他風險管理措施引發咗該商會約 1,700 名會員對中國商業環境「政治化」嘅高度關注。佢主張歐盟同中國當局進行更多對話，以解決歐盟企業嘅擔憂，否則未來可能會出現更多「針鋒相對」嘅貿易措施。佢話：「中國正在廣泛嘅經濟領域應用完全相同嘅做法，而歐盟依家先啱啱開始喺相當有限嘅範圍內咁做。」

有分析認為，儘管歐盟將中國定位為「夥伴和競爭對手」，並且祭出制裁同貿易調查等一系列強硬措施，中國卻對歐洲放軟姿態，希望修復近年同歐洲趨於緊張嘅關係。

中國外交部長王毅喺3月初舉行嘅「兩會」記者會上，反駁咗歐盟將中國描述為同時係「夥伴、競爭對手同系統性對手」。他再次重申北京立場，稱雙方嘅共同利益「大於」分歧。

王毅話：「中歐之間不存在根本利益衝突，也不存在地緣政治和戰略衝突。」又強調中歐「雙方應該被正確地定位為夥伴，並且合作應該是這項關係的決定性特徵。」北京並試圖透過向多個歐洲國家提供免簽證旅行等措施，來緩解同歐洲國家嘅緊張關係。《I》