美國聯邦眾議院3月13日以壓倒多數通過《保護美國人免受外國對手控制應用程式侵害法》，要求字節跳動喺180日內出售TikTok，否則TikTok將被美國封禁。呢個法案而家係參議院等待表決。美國總統拜登表示，如果呢個法案通過佢會簽署。

《華爾街日報》報道，有消息人士話，中國政府向 TikTok母公司字節跳動發出訊息，該公司高管將此解讀為中國政府寧可TikTok喺美國被封禁，亦不願其被出售。

中國商務部發言人早前表示，美方應停止無理打壓TikTok，還稱「相關方應嚴格遵守中國法律法規」。

知情人士表示，字節跳動高層認為，商務部發言人嘅講話加強咗中國政府嘅訊息，即係如果佢哋試圖拆離TikTok，就會面對監管障礙。去年中國已經警告過，賣出或者拆離TikTok可能涉及技術出口問題，需要按照中國嘅法律執行。

《紐約時報》報道，此舉尚未引起中國領導人作出高度戒備嘅反應或報復威脅，主要原因在於美方立場唔一致、中國握有法律反制籌碼，以及美方最終決策仍在評估之中。

雖然呢個法案喺眾議院過咗，但喺參議院仲唔肯定會否通過，再加上共和黨總統候選人特朗普突然轉軚反對，使立法成功嘅機會減少。

同時，中國政府握有關鍵法律籌碼，可以阻止TikTok嘅核心算法等敏感技術轉移出去。即使美國通過法案強迫賣出TikTok，但中國官員之前已經警告過，呢個交易要得到佢哋嘅批准。

報導指出，2020年特朗普想逼TikTok出售畀包括甲骨文（Oracle）同微軟（Microsoft）等在內嘅美國公司，但因為北京出台咗新嘅技術出口管制措施，最後並冇成功。專家認為，中國嘅新規定實際上阻止咗TikTok背後嘅技術轉移，保護咗佢嘅核心資產。

值得留意嘅係，雖然白宮支持眾議院嘅法案，但拜登政府仲未最後決定點樣處理TikTok。有分析認為，考慮到美國嘅立場同中國握有法律籌碼，北京可能希望呢場風波最終會自行消失。

TikTok喺美國有廣泛影響力，特別係青少年之間。估計喺美國有1.7億人用戶，高於2020年時嘅1億用戶。全球嘅用戶更加多，大約有10億用戶，遍佈140個國家。TikTok喺中國嘅版本叫做抖音，根據佢哋嘅最新統計數據，抖音喺2020年中期嘅日活用戶已經超過6億。《I》