立法會近日就23條立法開快車。有議員關注雙重國籍者需要參加義務兵役，保安局局長鄧炳強表示，相關人士要考慮國籍問題，若參加，該部隊又以中國為軍事目標，或會觸犯非法操練罪。佢仲表示，今次諮詢有收到「好意見」，包括取消潛逃人士嘅護照、吊銷其專業資格或董事身份，令該人為潛逃「付出代價」。

23條立法亦擬修訂《刑事罪行條例》下嘅「非法操練罪」，「A4聯盟」立法會議員楊永杰，以電影《大師兄》中甄子丹嘅角色陳俠為例，問及喺美國服兵役後回港擔任老師，相關情況是否違法。以至雙重國籍者嘅義務兵役問題。

鄧炳強指會適當豁免娛樂及教育性活動，例如黃埔軍校訓練課程，或因喺外地讀書需服兵役等，指出非法操練罪係針對接受外國訓練對付國家嘅行為，唔涉及教育、娛樂等範疇嘅訓練。但佢又提到，中國國籍法唔允許雙重國籍，若參加外國義務兵役，而該部隊又有機會以中國為軍事目標，或觸犯非法操練罪，相關人士要權衡雙重國籍嘅問題，「有機會同我哋國家宣戰、打仗喎」。

立法會議員陳紹雄就問及，如何辨別一些偽裝成野戰遊戲、實際為貫輸軍事知識及訓練嘅活動。鄧炳強話，需當事人證明其符合豁免嘅條件，當局亦會進行調查。

楊永杰亦關注會唔會取消潛逃嘅人嘅護照，或者係社會福利，甚至凍結佢哋喺香港嘅資產同埋生意。鄧炳強就話，喺諮詢期間收到「好意見」，包括取消福利、專業資格、商業登記同埋董事資格，目的就係佢哋要為潛逃付出代價。至於資產處理，佢指現有法例已經包括凍結資產。

至於有關延長被捕人嘅拘留期，鄧炳強好明確咁講會「認真考慮」延長，佢講而家只可以拘留48小時，如果冇足夠證據檢控，只能給予擔保，要有方法避免出現「唔需要嘅潛逃機會」。

喺諮詢意見方面，大部分都同意延長拘留期，分歧就係喺點樣執行，例如有人建議用刊憲或者其他方式公布「禁止接觸被羈留人名單」，幫助事務律師更清晰咁了解情況，避免法律界實務操作困難。都有意見提出「理想做法」係加入類似防疫隔離嘅「限制營」，目的就係防止潛逃，話營內生活唔受限制，「外國稱此做法為『軟禁』」，既反映無罪推定，又俾執法者盡職。

對於被捕人嘅拘留期間係咪可以見律師、見邊個律師，意見亦有唔同。例如有人提出違反《國安法》同埋23條嘅人，應該禁止喺律師陪同下錄取口供；有人提出疑犯應該喺受監視嘅情況下，先可以獲得法律諮詢嘅權利。都有反對意見提出，唔可以阻止被告見代表律師，認為此舉有違法治精神；當局引述「某外國律師會」指，必須確保疑犯能夠及時同自選律師會面嘅權利，同埋應該係唔受干預嘅情況下同當事人協商。

政府嘅回應就話只要能夠有效防範、制止同埋懲治危害國安嘅行為，而且符合香港嘅實際情況，「我哋都會積極考慮」；又指相關限制只會喺「合理、合法同埋必需」嘅情況下施加，任何涉及限制人身自由嘅措施，政府都會考慮規定「必須獲得法庭批准先可以行使」，同埋都會考慮訂明機制，畀被捕人就被施加嘅限制，向法庭提出覆核申請。《I》