自從俄羅斯入侵烏克蘭以嚟，雖然北京當局表面扮中立「勸和促談」，但實際上卻暗中支持俄羅斯，西方世界對中方真實立場其實心知肚明。3月4日，中國政府歐亞事務特別代表李輝抵達比利時首都布魯塞爾，同歐盟官員舉行會談。歐盟強調，俄羅斯嘅戰爭是對其安全嘅生存威脅，因此中國喺呢場戰爭問題上嘅立場不可避免地影響到歐中雙邊關係。

歐盟今次派出對外行動署亞太總司長科旺斯特倫（Niclas Kvarnström），俄羅斯、東部夥伴和中亞關係總司長塞伯特（Michael Siebert）同中方舉行會談。歐盟對外行動署嘅新聞稿寫道：「歐盟同中國代表討論咗俄羅斯對烏克蘭嘅非法侵略戰爭同埋促進公正、持續和平嘅途徑。歐盟強調俄羅斯要對無端同無理嘅侵略付上全部責任，同時強調尊重《聯合國憲章》原則同烏克蘭主權同領土完整，係任何最終解決方案嘅基礎。」

歐盟亦指出，俄羅斯發動嘅戰爭，對歐盟嘅安全構成嚴重威脅，所以中國對呢場戰爭嘅立場，不可避免地會影響歐中雙邊關係。歐盟會繼續不計代價咁支持烏克蘭取勝。

新聞稿提到：「歐盟歡迎李特使對基輔嘅訪問，希望呢次會談可以俾中國同烏克蘭，喺俄羅斯發動非法侵略戰爭兩年幾後建立實質性嘅聯繫。歐盟都希望中國作為聯合國安理會常任理事國能夠發揮建設性作用，維護同促進《聯合國憲章》同國際法。歐盟強調希望中國要求俄羅斯立即無條件尊重主權、獨立同領土完整原則，撤走所有軍隊同軍事裝備。」

中方就話，李輝同歐盟官員會談時交換意見，包括「烏克蘭危機」同和談進展。李輝亦表示反對歐盟將中國企業列入最新對俄制裁名單，要求歐方取消呢個名單同埋回到同中國對話協商嘅「正確軌道」上。

《南華早報》報道指出，歐盟官員喺布魯塞爾同李輝發生爭論，顯示雙方喺呢場已經進入第三年嘅戰爭問題上依然有好大分歧。消息人士話，喺一系列會談中，歐盟代表聽到李輝帶嚟嘅係「莫斯科嘅全部談話要點」。李輝周一由俄羅斯直接抵達比利時，之後會去華沙，再去基輔。消息人士話，李輝將喺周四到達基輔，之後會去巴黎同柏林。

消息人士話，李輝主要係附和咗克里姆林宮嘅觀點，佢同歐盟官員講，除非停止暴力，否則唔會討論烏克蘭嘅領土完整。又話，只有當歐盟停止向烏克蘭提供武器時，暴力先會停止。

李輝亦要求歐盟停止對中國公司制裁，因為烏克蘭嘅戰後重建可能需要呢啲公司。上個月，三間中國貿易公司因涉嫌向俄羅斯軍方輸送歐洲製造嘅商品而被歐盟列入黑名單。消息人士透露，李輝同歐盟官員講，俄羅斯經濟發展好，普京嘅支持率好高。歐盟官員就反駁佢，如果你「殺光所有反對派，你嘅支持率都會好高」，指嘅係最近喺獄中死咗嘅俄反對派領袖納瓦爾尼（Alexei Navalny）。

歐盟提醒話，雖然面對逆風，但佢哋對烏克蘭嘅支持堅定不移，而中方支持俄羅斯嘅言論會繼續損害雙邊關係。消息人士話，自從2023年5月李輝上一次歐洲之行以來，佢嘅立場冇變，當時佢帶嚟中方關於結束戰爭嘅十二點建議。

歐盟代表再次要求中方採取實際措施，證明佢哋冇企喺俄羅斯一邊，例如幫助確保被綁架至俄羅斯嘅烏克蘭兒童返國，或者確保被俄軍佔領嘅紮波羅熱核電站嘅安全。

報導提及，喺布魯塞爾會晤期間，李輝列舉咗俄軍取得嘅一系列成果，同埋提到特朗普可能重返白宮嘅前景。消息人士話，佢喺布魯塞爾會見咗瑞士外交官，因為外界猜測瑞士可能喺夏季前主辦由基輔支持嘅新一輪會談。

據一名消息人士透露，當歐盟問及北京是否會參加基輔支持嘅衝突問題多邊會談時，李輝表示反對，稱中方擔心該會議會「產生一個強加畀俄羅斯人咽下嘅計畫」。《I》