北京當局一直以嚟都將承認「台灣是中國一部分」作為同台灣政府談判嘅條件，如今莫斯科亦有樣學樣。俄羅斯前總統、聯邦安全會議副主席梅德韋傑夫（Dmitry Medvedev）昨（4日）表示，若是烏克蘭想要談判，就得先承認「烏克蘭是俄羅斯的一部份」。

《路透社》報道，梅德韋傑夫喺一場演說中透露，俄羅斯會繼續進行所謂「特別軍事行動」，直到烏克蘭投降為止。佢話，過去屬於俄羅斯嘅地方都會「回歸祖國」喺佢嘅演說中，佢站喺一張地圖前面，圖上顯示烏克蘭嘅東部同南部已經被俄羅斯佔領，似乎只有基輔一帶仲係烏克蘭嘅。

梅德韋傑夫話：「有一位烏克蘭前領導曾經講過，烏克蘭唔係俄羅斯。呢種觀念應該永遠消失，烏克蘭絕對係俄羅斯。」講完之後，現場掌聲雷動。佢亦都表示唔會同烏克蘭總統澤連斯基和談，話烏克蘭政府要同俄羅斯談判，就要先承認佢所講嘅「新現實」。

除此之外，佢仲講到東西方關係，話俄美關係而家比1962年嘅古巴導彈危機仲糟。佢都強調，西方而家應該明白，而家唔係殖民秩序嘅世界；依家嘅世界係建立喺平等、互利同夥伴關係上，而唔係武力同壓力。

事實上，北京當局對台灣亦經常有類似說法。例如，中國國台辦發言人朱鳳蓮喺2月28日嘅例行記者會中就表示，「台灣任何政黨，只要承認一個中國原則，同大陸交往都不存在障礙。民進黨只要改變台獨立場，大陸與之交往、對話的大門是敞開的。但如果堅持台獨立場，拒不承認體現一個中國原則的「九二共識」，則交往、對話都無從談起。」

烏克蘭方面，基輔昨日呼籲西方將被沒收嘅俄國資產嘅控制權移交俾基輔當局，幫助國家復原重建。

自從2022年莫斯科當局全面入侵烏克蘭後，西方就凍結咗俄國嘅銀行帳戶、投資同其他資產。華府同歐洲越嚟越多人呼籲喺呢數十億美元資產度設立基金，以支持烏克蘭。烏克蘭總理什米哈爾喺記者會度話：「我哋需要利用被沒收嘅俄羅斯資產，作為支持我哋國家同俾錢喺我哋復原嘅可靠來源。」

烏克蘭一直緊急呼籲更多嘅軍事同財政援助，不過美國嘅600億美元援助法案仲未經過美國國會嘅審議。什米哈爾敦促西方國家喺選舉同政治轉變之前，快速行動，因為呢啲轉變有可能阻撓援助工作。

另外，烏克蘭宣布，昨日成功炸毀咗俄羅斯西南部嘅薩馬拉州一條鐵路橋，因為呢條橋係用嚟運送「軍用物資」。呢次事件係對俄羅斯鐵路網一連串爆炸攻擊嘅最新一宗，基輔指責莫斯科當局利用呢條鐵路橋運送入侵烏克蘭嘅軍隊同裝備。

烏克蘭軍事情報機構指出：「俄羅斯薩馬拉州恰帕耶夫卡河上嘅一條鐵路橋被炸毀，支撐結構於2024年3月4日清晨約6時因爆炸而受損。」俄國利用呢條鐵路從查帕葉斯克鎮嘅一間工廠運送軍火。佢哋亦講：「睇到鐵路橋嘅損毀程度，佢將會長時間停用。」

俄國鐵路營運商稍早宣布，呢次事件係因為「未經授權人士嘅干預」，但係冇人受傷，同時提到「呢段鐵路交通將會暫時停止」。《I》