喺2019年嘅反修例運動期間，美籍律師Samuel Bickett因被控襲警而入獄。最近佢喺社交平台引述律政司內部電郵指，美國裁裁名單入面有一位高級助理刑事檢控專員陳淑文已經離職，結束佢喺律政司嘅28年生涯。對此，港府發新聞稿澄清佢係喺制裁名單出現前就已經請辭，又話外國制裁「只會令大家更堅決落實維護國家安全的義務和責任」。

喺社交平台X上，Samuel Bickett援引咗律政司嘅內部電郵，指高級助理刑事檢控專員陳淑文（Alice Chan Shook-man）已經辭職。Bickett指陳淑文曾經被美國列入制裁名單，佢係名單上嘅第一位辭職嘅人，但佢唔清楚陳淑文辭職嘅原因同埋日期。根據Bickett向美國之音提供嘅截圖，陳淑文喺1月15日向律政司嘅同事發咗電郵，指呢日係佢嘅最後一個工作日。

翻查資料，美國國會兩黨議員去年11月2日共同提出咗《香港制裁法案》，第一次點名多名涉及《港區國安法》嘅法官同檢控官。名單入面有49人，包括律政司司長林定國、高等法院法官杜麗冰、區域法院法官陳廣池、區域法院法官郭偉健、律政司高級助理刑事檢控專員陳淑文等。

之前，美國國會同行政當局中國委員會（CECC）喺2022年7月發佈咗一份研究報告，建議制裁15人，指佢地有參與香港政府嘅政治案件，陳淑文嘅名字都喺名單上。

根據過往嘅紀錄，陳淑文冇參與過《香港國安法》相關嘅案件，但佢曾經處理過一宗同前民主黨立法會議員林卓廷有關嘅上訴案。當時，林卓廷被指披露負責2019年元朗721襲擊事件嘅警司游乃強被廉政公署調查，被裁定「披露受查人身分」罪成，判囚四個月。林卓廷後嚟上訴得直，而陳淑文係案中律政司嘅其中一名代表。

根據陳淑文2016年一次喺香港城市大學嘅就業演講介紹，佢喺英國取得法律學位，1993至1995年喺香港、英格蘭同埋威爾斯做律師。佢喺1995年加入當時嘅律政署，1998年成為高級政府律師。

Bickett表示，「我哋唔知道佢辭職嘅確切原因，有可能佢甚至喺被列入《制裁法》之前就發出咗離職通知。無論佢嘅理由係乜嘢，呢啲制裁唔係為咗懲罰香港公務員。相反，制裁係試圖阻止啲堅持破壞香港自治同持續迫害政治異議人士嘅人。」

Bickett指出，由於陳淑文已經辭職，而且只參與過一宗已知嘅政治起訴，所以有理據將佢嘅名字從制裁目標名單中刪除。佢講：「咁樣做會傳達一個訊息，如果你辭職，同埋遠離呢啲持續嘅侵犯人權行為，就可以降低你成為目標嘅風險。」佢指出，議員可以喺《香港制裁法》送交委員會審議時作出修改，佢鼓勵共同提案嘅國會議員支持將陳淑文從呢個法案嘅目標名單中刪除。

律政司2日回應傳媒查詢時宣稱，一向唔會對個別員工動向作評論，但為以正視聽，指相關人士喺去年9月，即制裁名單於去年11月出現前已經請辭。律政司重申，所有人員一如既往，無畏無懼履行職務，維護香港法治；外國政客對律政司同僚作出違反國際法嘅制裁威脅，只會令大家更堅決落實維護國家安全嘅義務同責任。《I》