羅奇再談「香港玩完論」 直言如果北京真係希望維持國際金融中心地位 就畀香港自我管理
羅奇再談「香港玩完論」 直言如果北京真係希望維持國際金融中心地位 就畀香港自我管理

昔日「中國大好友」、大摩亞洲區前主席羅奇早前稱「我很痛心咁話,香港已玩完」引起熱議。如今佢就開出「解方」,指如果北京真係希望呢個金融中心擁有更好嘅未來,就必須修復自身經濟並讓香港自我管理(let Hong Kong run itself)。

    

據彭博報道,而家係耶魯大學嘅資深研究員嘅羅奇21日喺彭博電視接受訪問時表示,依家北京最緊要嘅事係要「修理返自己嘅系統」。佢又補充咗話,北京都要更積極啲、更透明啲宣揚對「一國兩制」嘅承諾。羅奇認為,要解決中國經濟長期嘅結構性問題唔係咁易,到而家為止北京當局為遏制通貨緊縮同埋樓市低迷等問題所採取嘅措施明顯「微不足道」。

    

講到由國家主席習近平親自指揮、親自部署嘅粵港澳大灣區,羅奇認為,呢個概念係以中國為中心,允許香港發揮作用,但係深圳等其他城市可能發揮同樣重要,甚至更重要嘅作用,因此「香港面臨被邊緣化嘅風險。」

    

當主持人問起,依家北京喺建立「新香港」嘅過程中,能唔能夠達到一個大家都覺得啱啱好嘅平衡點,令到羅奇同前港督彭定康都能夠接受。羅奇嘅回應係:「我覺得而家已經好難再搞返一個大家以前鍾意嘅香港。」佢仲用投資嘅例子嚟比喻,話當一隻股票嘅價錢已經達到目標之後,投資者就應該考慮放手。

    

羅奇2月12日喺英國《金融時報》撰文指,「我痛苦地承認香港已經玩完。」佢指出,因為本土政治、中國經濟同埋中美關係轉差等因素,北京推出嘅救市措施可能都難以挽救香港嘅經濟。羅奇直言,股市一直都係香港成功嘅象徵,但係過去20多年,香港股市嘅表現幾乎係全球主要股票市場之中最差嘅。

    

羅奇嘅論點引起咗港府同埋好多親中政商界名人嘅批評同反駁。即將卸任嘅香港交易所主席史美倫話佢「絕對唔同意」呢啲悲觀嘅觀點,而係將市場低迷歸咎喺外部因素身上。史美倫上星期喺一個公開場合同記者講:「不斷有人話香港已經無路可走,我哋一直證明佢哋錯咗。」

    

行政會議召集人葉劉淑儀就同樣喺《金融時報》撰文反擊,稱聯儲局加息同其他美國政策係香港股市困境嘅「根本原因」。政務司司長陳國基就喺電台節目上稱羅奇嘅言論係「嚇唬人」。

    

不過本港亦有人提出需要深刻反思羅奇嘅論點。前運輸及房屋局長張炳良於《明報》撰文指,香港須深思羅奇嘅論點,莫輕易訴諸「反共反華勢力亡我之心不死」,更指世界在變,別以為大灑金錢搞盛事可輕易返回世界舞台中央。

    

張炳良指出,羅奇曾長期駐港,對中國內地和香港財經金融情況相當熟悉,而他轉變觀點更令人意外。雖然當局不認同羅奇嘅說法,認為香港嘅勢頭仍好,然而,對於一些長期睇淡香港或已移民撤資嘅人來講,羅奇嘅觀點似乎提供咗一個權威認證。張炳良又指羅奇由大好友竟變成大淡友,並指「遺址論」和「玩完論」來自完全不同背景,可見對香港現况嘅質疑正在升溫。

    

張炳良認為,香港現時面對兩大挑戰,一係「被去兩制化」,若處處跟內地、靠國家,未能發揮獨特所長及貢獻,所謂制度優勢只會淪為空話;而另一挑戰,就係能否把握國安法嘅治理藝術,避免出現揸得太緊及自我設限,遏抑原本多姿多采嘅生活同工作氛圍。張炳良直言,香港嘅命運已與國家嘅命運緊扣喺一齊,唔能想像可返回往昔中西「左右逢源」嘅日子。《I》

發佈時間: 2024年02月22日 15:50
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.