星島:夏寶龍訪港23條非主要目的 為港經濟把脈為主  建制內鬥! 曾鈺成被控「關鍵時刻造反」
星島:夏寶龍訪港23條非主要目的 為港經濟把脈為主 建制內鬥! 曾鈺成被控「關鍵時刻造反」

工聯會立法會議員陳穎欣,近日喺YouTube影片中數落建制派元老級人物曾鈺成,質疑佢喺23條諮詢期間倒米「關鍵時刻造反」,外界質疑香港已經進入大批鬥時代。雖然陳穎欣「敢於鬥爭」,但中央依家恐怕並不樂見建制派內鬥!事緣《星島日報》昨(20日)引述消息人士指,港澳辦主任夏寶龍本周四至下周二訪港6天,主要係為考察本港經濟民生情況,23條立法並非重點。

    

陳穎欣前排喺自己嘅節目上攻擊「雙曾」——即係前財政司司長曾俊華同前特首曾蔭權,話佢哋兩個當權嘅時候「孖住上」,同官媒唱反調。近日又批評曾鈺成卸任立法會主席之後,好多行為都好難明白,包括喺所謂「黑暴」時期入去理工大學「救暴徒」等等,質疑佢屢次「倒米」。

    

喺反送中之前,即係2017年,曾鈺成(Jasper Tsang)、曾俊華(John Tsang)同田北俊(James Tien)三個人計劃組成聯盟,因為佢哋三個嘅英文名頭個字都係J,姓氏都係T,所以聯盟嘅名叫3JT,雖然最後冇成功結盟,但三個人好合拍。

    

2020年4月疫情期間,三個人喺中環現身派口罩。陳穎欣話,三個人9月立法會選舉前夕現身喺鬧市區肯定有政治目的,田北俊想推自己嘅人入立法會,而「雙曾」就支持佢。

    

本月6日,曾鈺成喺《明報》撰文討論23條。陳穎欣覺得曾嘅論點「令人搲頭」,「似質疑多過支持23條立法。」陳穎欣形容曾鈺成嘅說法唔止係「哽耳」,而且「唔係好清晰咁幫大家理解23條立法」,「如果同一番說話由民主黨講出嚟都無咁突兀」。

    

曾鈺成喺文章上半部分對23條持認可態度,話立法除咗履行《基本法》第23條責任之外,仲要全方位應對香港特區現時同未來可能出現嘅國家安全風險,立法要覆蓋更多國家安全問題,係正確又必須嘅事情。不過佢之後話鋒一轉,向政府提出建議,指要分清楚敵我矛盾同人民內部矛盾。

    

佢話,市民對政府立法嘅建議有啲懷疑係好自然嘅,為咗確保立法工作順利進行,得到大眾嘅真心支持,政府要將市民提出嘅質疑同批評同敵對勢力嘅攻擊區分開來。「唔可以一聽到負評,就用對敵鬥爭嘅態度去打壓。」

    

對23條諮詢文件,曾鈺成都提出幾個質疑。首先係社會上最多議論嘅「非法披露國家秘密罪」。佢指出,國家秘密嘅定義會唔會太籠統、範圍太廣?公眾利益可唔可以作為辯護理由?

    

佢進一步指出,如果傳媒攞到啲重要經濟數據,或者難以判斷係咪「國家秘密」。發表咗,可能會墮入法網。但如果唔發表,就剝奪咗公眾嘅知情權,咁新聞自由會唔會受損呢?

    

曾鈺成仲講,某啲資料嘅披露係咪「相當可能危害國家安全」,係由邊個來判斷呢?當中涉及對「國家安全」嘅解釋,邊個係最後嘅權威呢?佢覺得政府嘅講法有啲模糊。

    

23條諮詢文件入面有提出完善「煽動意圖」嘅定義同相關罪行嘅建議,曾鈺成質疑將「意圖」寫喺法案度,會唔會太廣泛?例如個別人或者族群之間嘅爭執,好可能會激起居民之間嘅敵意,係咪都係「煽動意圖」,會唔會變成危害國安嘅罪行呢?

    

有網民諷刺咁話,陳穎欣係「戰鬥格,果真係有樣睇嘅,連前主席都鬥埋一份」又指「敢於鬥爭係工聯會嘅傳統,要上位,就要鬥自己人」。但「敢於鬥爭」係咪依家中央希望見到嘅呢?恐怕唔係。

    

《星島日報》大棋盤專欄引述消息人士撰文,指今次夏寶龍不足一年再次訪港,主因係「現時香港經濟陷低谷」,中央想了解商界在內嘅各方意見。據悉,夏寶龍訪港行程包括同行會成員、立法會議員、法律界團體、商會及專業團體會面,亦有機會同去年一樣,同新上任嘅區議員「飲茶」了解民情。

    

文章稱,23條本地立法雖是特區主體責任,但涉及國家安全,除要解各方對23條立法看法,亦希望向外資派定心丸,要向本地各個板塊、外商等說明中央重視香港投資環境。

    

文章引述官場消息指,「中央非常緊張香港經濟」、長遠發展方向以至香港喺國家發展中嘅角色,預料蒐集意見後,中央會審視有何措施可支持香港。又話中央近年大興調研之風,強調要聽真話,察實情,探討解決群眾「急難愁盼」嘅良方。《I》

發佈時間: 2024年02月21日 13:28
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.