《日本經濟新聞》周一（19號）引述消息人士報道，香港司法人員推薦委員會曾經喺2021年，提名推薦咗6個人出任高等法院法官，但最終有3個人未獲時任特首林鄭月娥任命，其中一人未能通過背景調查，另一人因擔憂《國安法》對香港法律環境嘅影響而自行退出。報道指，由於事件敏感，候選人嘅身份未公開。法律界人士指，撤回提名申請前所未聞，法官政治背景審查已經加劇。

報道引述消息人士指，儘管香港法官嚴重短缺，2021年司法人員推薦委員會曾推薦6人擔任高院原訟庭法官，只有3位獲特首委任，包括陳仲衡、黎婉姬和鄭蕙心，餘下3位未獲任命。3位獲委任人選中，陳仲衡、黎婉姬喺2021年11月獲時任特首林鄭月娥任命，陳仲衡曾主審「佔中九子」案件，黎婉姬則為前副刑事檢控專員。而鄭蕙心於2022年1月獲任命。

報道指，目前高等法院法官職位嘅空缺率高達36%，喺法官任命不足嘅情況下，好似黎智英嘅國安案件就一再推遲，許多被告仍在監獄等待審判。曾任香港大律師、紐約大學美亞法律研究所非常駐學者張語軒指，法官短缺明顯令人震驚，延長咗被告面對懸而未決嘅司法程序。

美國喬治城大學亞洲法中心研究員黎恩灝表示，《國安法》實施前，司法人員推薦委員會推薦嘅人選，普遍會獲特首任命，未見傳媒揭發特首唔任命嘅情況。佢指出，推薦委員會提名嘅候選人本就通過品格同專業能力審查，質疑特首作出唔任命決定時，考慮準則是甚麼，是否包括政治審查等。

有本港法律專家對《日經》透露，撤回提名申請係非常罕見嘅情況，因為審查過程非常嚴謹同埋冗長。有幾位唔肯透露姓名嘅老牌律師指出，《國安法》帶嚟嘅波瀾效應令法官嘅職位唔再咁吸引人。

另外，有資深律師直言：「政治背景審查已經加劇，法官必須非常值得信賴」。有法學專家形容，任何人成為法官都要面對一個根本性嘅困境同衝突，一方面要「保障由國家規定嘅法律同國家主權」，另一方面要「司法公正同保障香港居民嘅基本權利」。

而且，去年11月美國國會提出咗《香港制裁法》（The Hong Kong Sanctions Act），涉及制裁49名香港官員、法官同檢控官。《日經》報道指，香港律師會前會長彭韻僖去年11月喺閉門會議曾表示，呢個法案會令司法機構更難吸引人才。報道援引另一位資深律師表示：「邊個會想將自己置於風險之中，損害自己嘅聲譽呢？」

林鄭月娥拒絕回應事件，律政司司長同大律師公會都拒絕評論。而司法機構就拒絕評論2021年嘅高院法官提名，但確認自2020年1月以來，只係任命咗3名高等法院原訟法庭法官。

現時司法人員推薦委員會嘅9人名單，包括終審法院首席法官張舉能、律政司司長林定國、高院首席法官潘兆初、高院上訴法庭副庭長朱芬齡、大律師公會主席杜淦堃、香港律師會前會長彭韻僖、前教資會主席唐家成、前中大副校長廖柏偉教授同消委會前總幹事陳黃穗。《I》