緬甸內戰持續進行，有傳緬甸政府軍裝備嘅中國FTC2000G戰鬥機被擊落咗好幾次。分析指，呢款世界最平嘅4代戰機可能係因為性能不足，所以易被擊落。亦有分析認為，擊落呢款中國製戰機嘅武器可能就係中國生產嘅前衛2防空導彈，可能係北京故意開後門漏洞所致。

呢架飛機係由中航工業貴州飛機公司推出嘅一款輕型多用途4代戰機，原型係FTC2000山鷹高級教練機。而實際喺對外武器貿易中，客戶多數都將山鷹當做輕型多用途戰機使用，而唔係當做高級教練機。

據中國媒體《騰訊網》報道，FTC2000山鷹高級教練機配備有較先進嘅中國製造航電設備，可以使用多個型號嘅中國製導彈，因而受到一啲國外客戶嘅青睞。貴州飛機公司因此喺山鷹嘅基礎上增強咗作戰能力，推出輕型多用途戰機新型號FTC2000G。

FTC2000G戰鬥機可以使用霹靂12、霹靂8空對空導彈，執行超視距空戰和格鬥空戰，亦都可以裝備中國出口嘅「雷石」系列制導炸彈、C702反艦導彈等，用嚟支援對地面同埋水面嘅轟炸任務。仲保留咗一部份教練機嘅功能。

據稱FTC2000G喺國際軍火市場上售價唔到1000萬美元，僅約950萬美元，可謂「性價比極高」，因此呢款戰機推出之後就吸引好多亞拉非兄弟國家訂購。

不過正所謂「平嘢無好」，幾年黎已經有好多架FTC2000G被擊落。唔單止緬甸政府軍，呢款戰機嘅另一大客戶尼日利亞，亦都係戰場上蒙受咗唔少損失。唔少分析質疑呢款戰機，多次被擊落係因為性能有問題，甚至係中方刻意開後門所致。

而中國媒體對此嘅解釋係「一分錢一分貨」。中媒報道稱，FTC2000G因為成本限制，缺乏有效嘅紅外同埋電子對抗手段，面對防空導彈嘅時候生存能力就會比主流戰鬥機差啲。又話之前喺緬北地區衝突當中，該戰機被中國製前衛2防空導彈擊落，但「如果有一套紅外對抗設備，或者有紅外干擾彈，就有機會逃離攻擊」。

中媒亦將責任歸咎客戶，稱FTC2000G嘅客戶水準「比較有限」，因為無論係尼日利亞定係緬甸，佢哋嘅空軍訓練水準唔高、戰術思想落後、經費有限，因此佢哋無法採購足夠嘅制導彈藥，在採用低空投彈嘅時候容易被單兵防空導彈擊落。

中媒更貼心「建議」亞拉非兄弟國家，指同樣嘅價格喺中國可以買到性能強大嘅「彩虹5」或者「翼龍2」無人機，對地打擊效率就會比FTC2000G戰鬥機更高，不過就冇空戰能力啦。而如果兄弟國家們經費足夠，就可以購入2000萬到3000萬美元單價嘅戰鬥機，或者選擇4000千萬美元以上嘅梟龍戰機。

中媒最後話，經費係呢啲亞拉非兄弟國家提升軍事實力最大嘅問題，又話佢哋買戰機大多數都係為咗好睇，實際喺軍事衝突中能發揮嘅作用有限。總歸一句，「責任完全不在我方」。《I》