大話怕計數! 港府料財赤544億 兩大會計行估約1200億  謝金河:香港的慘會出乎大家預料
大話怕計數! 港府料財赤544億 兩大會計行估約1200億 謝金河:香港的慘會出乎大家預料

港府將喺今個月尾公布新一份財政預算案,香港四大會計師行之一嘅德勤Deloitte預測,2023/24財政赤字將達1172億港元,比港府原先預估嘅544億港元高出一倍多;澳洲會計師公會更預期,赤字將達1270億元。台灣財經專家、財信傳媒董事長謝金河近期對香港經濟作出評論,坦言:「香港的慘,可能會出乎大家預料!」

    

德勤喺周一(5日)嘅記者會中指出,因賣地、印花稅收入減少等原因,導致財政赤字遠超港府早前預測嘅544億元,港府財政儲備亦由去年3月底嘅8348億元,降至7176億元。德勤中國稅務合夥人尹佩儀表示,香港稅基窄同財政狀況緊張下,唔建議加稅、推出新稅種或再派消費券,建議港府控制開支,專注改善經濟情況,以量入為出方式理財。

    

唔單止德勤,澳洲會計師公會周二更將財政赤字預估推至1270億元,至3月底嘅財政儲備跌至7080億元,相當於政府約11個月開支。公會建議港府新一份財政預算案,應平衡考量應對財政赤字,亦兼顧支持香港經濟復甦和可持續發展。

    

雖然專業界對財政狀況唔太樂觀,但財政司司長陳茂波早前仍堅持,政府財政狀況相當穩健。不過佢承認政府賣地情況唔理想,導致收入減少。陳茂波講:「呢啲短暫嘅情況對今年嘅財政有影響,所以今年2023-24年,政府嘅赤字會比原本預算案嘅時候高,原本預算案發表嘅時候大概係500幾億。」

    

至於特首李家超,在去年嘅立法會接受質詢時,對財政赤字持「樂觀」態度。李家超講:「我哋今年都係正增長,相信我哋嘅GDP,我哋唔應該妄自菲薄,我哋有危機感,但唔好太自己嚇自己。」李家超表示,推動整體經濟發展政府有帶頭作用,會「開大門」建立政府同企業嘅關係,希望企業自己「開小門」發掘商機。

    

謝金河喺佢嘅社交平台發文指出,香港股市近年嚟持續低迷,特別係一啲重要企業嘅股價驚人嘅下跌,已經令人擔憂。唔單止快手、嗶哩嗶哩等科技巨頭股價暴跌,連半導體、電動車等產業嘅領頭羊都冇法倖免,呢啲反映出資金嘅大量流出同埋市場信心嘅嚴重缺失。

    

除此之外,謝金河都指出「香港商辦大樓空置率頻創新高,股價破底,愈跌愈深,且毫無支撐力」,直言呢啲係「逐漸走向枯竭嘅象徵」,點戔香港作為國際商業中心地位嘅逐步下滑。《經濟學人》嘅報導亦都強調香港唔再似國際化城市,顯示出香港正逐步失去佢吸引國際資本同人才嘅能力。

    

更令人擔憂嘅係,謝金河比喻香港嘅經濟狀況為「溫水煮青蛙」現象,好多人對於而家嘅危機似乎並冇足夠嘅認識同準備。佢更進一步講到,隨著基本法23條立法,香港似乎正被無形地引向一個未知嘅未來,而本港長久繁榮嘅元素都喺逐步流失之中。《I》

發佈時間: 2024年02月07日 13:18
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.