23條立法如箭在弦，政權機器正傾全力為法案擦脂抹粉，官媒《新華社》更不惜喺3日發表署名為「港澳平」嘅文章，以粗言鄙語「痛斥」反對者。美國媒體《自由亞洲電台》批評，官媒使用大量粗鄙詞語痛斥反對者，完全不顧中國所擁有嘅五千年文明。

《新華社》以「爲什麽反中亂港分子如此害怕和阻撓23條立法」為標題撰文。文章稱，「香港内外有那麽一些人總是對23條立法感到如芒在背、如鲠在喉。日前特區政府啓動23條立法公衆咨詢之後，他們就像是熱鍋上的螞蟻，紛紛跳起來對23條立法進行各種攻擊抹黑，大肆編造謊言、煽惑恐慌，要把這項立法污名化、妖魔化。」又話反對立法者淨係極少數人，凡係愛國愛港嘅人都冇擔心，只有反中亂港份子先會感到害怕，「作賊心虛」，竭力抵制滋擾立法。

文章接著稱，「他們那是心裏有鬼」，雖然嘴上支持一國兩制，但實際上唔認同唔接受香港回歸，總想抗拒、排斥中央對特區嘅全面管治權，要將香港變成一個獨立半獨立嘅政治實體。文章批評，「他們那是甘心當狗」、「不願做堂堂正正的中國人，卻要做被敵驅使的狗奴才」。

文章緊接著越鬧越勁，話反對者「數典忘祖、認賊作父，瘋狂出賣國家和香港利益，把漢奸國賊做到了家。」文章最後稱，「23條立法決不會因爲一群蒼蠅走狗的阻撓而受到幹擾，他們休想在香港由治及興的進程中螳臂當車、蚍蜉撼樹！」

然而，除咗港府同中央明顯「擘大眼，講大話」為23條立法開脫之外，外界幾乎所有分析都認為23條立法將會為香港劃上「句號」。

財經評論員顏寶剛分析，23條諮詢文件參照中國國家機密定義，涵蓋範圍深遠無邊界，包括中港關係、經濟及社會發展都成為「機密」，而資訊缺乏透明度，威脅香港嘅國際金融中心地位。對於《基本法》23條涵蓋「網絡電腦活動」，顏寶剛擔心會出現「灰犀牛」效應，例如Facebook、Youtube等網上平台，有機會面臨政治風險而撤出香港。

香港資深對沖基金經理錢志健認為，23條立法確實係宣告香港一國兩制制度終結，而家很多機構都喺調整營運模式，再加上23條立法，形容係「捏死香港」。錢志健相信除咗同大陸做生意嘅公司，其他企業都會將香港視為後勤辦公室，而將重心轉移新加坡或者日本。

時事評論員劉銳紹表示，其實《港區國安法》實施之後已經唔再有反對意見，認為北京依家再推23條冇咩太大分別，「淨係滿足咗中國官方嘅心理需要，俾佢哋感覺安心——就好似一副昂貴嘅盔甲，你穿上去只係保護自己，唔能夠攻擊人，從窗戶望出去視野好窄，但係你感覺好安全。」

學者鍾劍華就認為，法案定義好廣泛同埋模糊，23條立法過後，北京同港府就可以係《港區國安法》之外，再用另一個法律武器去對付唔同意見嘅人，「呢樣嘢將進一步確認香港唔再係國際城市，令呢度充滿威嚇同威脅」。《I》