近期中國經濟顯著下行，樓市接連出問題，走資潮持續發生，但中南海權鬥就似乎並未停息。原定去年喺北京舉行嘅「三中全會」，喺上星期三（31號）習近平主持嘅中央政治局會議中，並無提及開會日期，意味著「三中全會」可能會再延期。《自由亞洲電台》引述分析指，大會延期同習近平想將夫人彭麗媛加入政治局有關。

報道引述時事評論員劉銳紹表示，去年冇開「三中全會」嘅原因，可能涉及習近平要處理前外長秦剛同火箭軍內部人事問題，而家已經解決；按常理，新年初會舉行「三中全會」，亦唔排除習近平會「打破慣例」，喺新年後先突然通知官員到北京開會。

劉銳紹表示：「而家好難講『三中全會』會唔會開，只係一般來講處理『三中全會』係特殊情況，平時去年10月或者年尾就會開。喺人事布局上，外界有傳（習近平）想將彭麗媛加入政治局，如果真係咁（有呢個決定），就要經過全會決定。」

事實上，彭麗媛近年來經常陪同習近平出席國際場合，又積極訪問越南、中非等地，見當地總統夫人，推動男女平等同提升婦女權益，成為中國「一帶一路」倡議中「軟性外交」嘅一個重要角色。

2021年10月26號，中美合作嘅天津茱莉亞學院正式落成，彭麗媛發去賀信。李鴻忠主政嘅天津喺幾日之後就迅速舉辦咗「學習彭麗媛教授賀信精神、做好天津對美人文交流工作研討會」，大讚彭麗媛嘅賀信為「新形勢下」進行對美國嘅人文交流「指明方向」。呢次係官方首次讚揚「彭麗媛精神」，並且將一向只用喺習近平身上嘅「指明方向」嘅說法，套用喺彭麗媛身上。

去年6月，彭麗媛以聯合國教科文組織促進女童同婦女教育特使身份，向中非婦女論壇透過影片致詞時講到，「這些年，我接觸了很多非洲女性，他們熱情勇敢，自強不息，令我印象深刻」

去年11月，彭麗媛出席咗中國前總理李克強嘅喪禮，行喺人群前面。相比之下，喺前總理李鵬同中共第三代領導人江澤民嘅告別儀式上，彭麗媛就冇同習近平一齊去弔唁。上星期三（24日），彭麗媛更加破天荒單獨舉行外交活動，喺北京會見咗烏茲別克總統夫人。

外界猜測，彭麗媛可能想通過呢啲方式發放信號，或者喺習近平嘅支持下，從中央候補委員「三級跳」到中央政治局委員，成為第25名委員。《I》