北京當局早前公布，2023年中國GDP增長為5.2%，被外界普遍認為數據有嚴重「水份」。美國知名經濟研究機構「榮鼎集團」（Rhodium Group）分析，增長5.2%嘅官方數據，同過去一年嘅萎靡證據以及相應決策唔相符，估計實際增長數據應為接近1.5%。唔少基金經理表示，佢哋現時對唔包括中國嘅亞洲基金產品更感興趣，對中國經濟則持續保持憂慮。

中國總理李強近日喺達沃斯世界論壇上演講時話，中國去年嘅經濟增長達到咗5.2%，完成咗設定嘅增長目標，而且係冇依靠「大規模刺激」。但係，好多分析師對呢個官方數據表示質疑，認為喺樓市、消費、股市同埋出口等方面嘅不利局面下，好難相信中國經濟已經脫離困境。

中國去年嘅出口下滑，係七年嚟首次，樓市危機持續，就業不穩定下嘅民眾消費降級。最新數據顯示，上個月嘅社會零售銷售創下三個月新低，顯示內需動能不足。

華府智庫戰略與國際研究中心（CSIS）嘅經濟學家甘思德（Scott Kennedy）指出，對中國官方數據嘅質疑係普遍而且合理嘅。佢話，優於預期嘅增長數據有助於創造經濟動能，鼓勵民間投資同家庭消費，但中國企業界同投資人似乎唔相信中國經濟已經走出困境。

彼得森國際經濟研究所（Peterson Institute for International Economics）高級研究員哈夫鮑爾（Gary Clyde Hufbauer）表示，「中國股市表現非常差，呢個唔單止反映咗外國投資者嘅消極態度，仲反映咗中國本地投資者嘅消極態度。當然，房地產市場嘅問題都係一大因素。」佢指，「李強冇列出吸引西方企業嘅具體措施，呢個會令人更加懷疑。」

榮鼎集團話，增長5.2%嘅官方數據同過去一年嘅經濟表現唔符，亦同相關嘅決策唔一致。佢哋估計，中國去年實際嘅增長數據接近1.5%，並預測2024年嘅增長率為3%至3.5%。北京對數據嘅公佈不夠透明，去年夏天青年失業率升到創紀錄嘅21%之後，中國停止公佈相關數據，直到上週。經過「完善」統計方法後，該數據變成15%。

無論官方數據嘅準確性點樣，唔確定性同欠缺透明度嘅代價主要落喺中國自己身上。榮鼎話，「決策者冇法解決經濟問題，因為咁做將公開承認問題存在，亦將抑制全球企業嘅投資」。

摩根士丹利嘅一份報告指，去年12月中港股市嘅資金淨流出量係去年最大，同埋係歷史上第三大嘅月度走資。來自美國同歐盟嘅主動管理長倉基金經理都加快賣股票，嚟滿足贖回需求。據大摩估計，12月份中國或香港股票嘅月度淨流出量高達38億美元，規模僅次於2015年8月同2020年3月。

新一年入面，外資繼續透過滬港通賣出中國股票。以iShares ETF持有嘅新興市場資產（中國除外）嚟睇，由2020年底嘅1.64億美元，飆升到大約88億美元，超過咗中國ETF嘅資產。

凱基亞洲投資策略部主管溫傑表示，十多年前中國經濟急速起飛，成功推動咗騰訊、阿里巴巴等企業嘅發展，令以往買入A股成為分散風險嘅選擇，但而家買入呢啲股票反而增加風險。

溫傑話，根據唔少基金經理嘅講法，佢哋而家對唔包括中國嘅亞洲基金產品更加感興趣，反映佢哋對中國經濟增長同內房市場嘅憂慮，「政策上嘅不明朗因素令外資睇唔透，再加上近一、兩年投資中港股市輸咗唔少，無回報之下自然未必想繼續買」。

溫傑話，對於中港以外嘅亞洲市場，佢審慎樂觀，「香港、中國暫時都係資金流出嘅形勢，亞洲其他國家則大機會係獲利回吐，而非資金流走，未來兩、三個禮拜係關鍵」。佢又話，市場唔單止有股市一種投資工具，當未掌握到關鍵市場資訊嗰陣，可以考慮部署其他資產。《I》