中國科技公司青島三祥喺俄亥俄州嘅美國子公司哈科製造集團（Harco Manufacturing Group）總部，喺18日被美國國土安全部進行突擊搜查。與此同時，美國國會將禁止五角大廈向六間中國企業採購電池。對此，北京御用專家就痛批美國，妄圖借國防安全嘅名義，喺一啲敏感技術領域打壓中國。

美國眾議院嘅中國問題特別委員會之前已經指控青島三祥，話佢哋進行貿易欺詐同埋逃避美國嘅關稅。國土安全部嘅發言人話，呢次搜查係一個聯邦調查嘅一部分。

2023年9月，美國眾議院嘅中國問題特別委員會嘅成員曾經去信國土安全部，指青島三祥為咗逃避25%嘅美國關稅，將部分生產轉移到泰國。信中提到青島三祥公開嘅文件，指為咗減少關稅成本，要加快喺泰國嘅生產。信中批評青島三祥嘅行為係「公然嘅貿易欺詐，對美國製造商造成嘅影響係災難性嘅。」

另一邊廂，根據美國去年底通過嘅2024財年國防授權法案，美國國防部將被禁止從寧德時代、比亞迪、遠景能源、億緯鋰能、國軒高科、海辰儲能等六家中國企業採購電池，呢個禁令將喺2027年10月生效，不過禁令唔適用於商業採購。目前喺全球十大電池供應商當中，只有三間唔係中國企業。

中國社科院美國問題專家呂祥表示，美方嘅目的係想借國防安全嘅名義喺一啲敏感技術領域打壓中國。但實際上呢種做法對美國自己都會造成好大嘅傷害，因為中國喺相關領域係領先，而美國需要呢啲產品。

佢話，像寧德時代呢啲掌握技術嘅全球領導企業，對美投資一定要謹慎而行，了解其中嘅市場風險同政治風險，尤其係當前美國正處於一個極度唔穩定嘅政治動盪時期。《I》