歐盟駐華大使托萊多（Jorge Toledo）表示，北京當局對國家安全嘅執迷，令中國嘅經濟復甦蒙上陰影，並質疑北京最新公布嘅增長數據。而中國官媒則稱「中國經濟穩健前行，持續為世界經濟發展提供強大動力」，甚至話中國係全世界最值得信任嘅國家。

《南華早報》17日報道，喺墨卡托中國研究所（MERICS）周三舉辦嘅線上研討會上，托萊多講到：「我哋原本以為開放同解除疫情封控會減少控制，令人民感到更加自由。但實際情況唔係噉。」佢話，而家歐盟外交官發現，佢哋好難見到中國官員（官員同外國人接觸需要安全許可），甚至連中國嘅學者同智庫成員都好難見到。

呢位歐盟駐華大使解釋話，而家喺中國，「對國家安全嘅日益執迷隨處可見，到處都有裝咗面部識別功能嘅攝影機。國家同黨嘅幹部同官員要見外國外交官都需要獲得許可，幾年前係唔會噉樣，呢啲係近期先出現嘅情況。」

呢位西班牙外交官話，喺新冠疫情之後，呢種控制程度已經擴展到學術界。「你再冇得自由咁進入中國嘅大學。大學裏面嘅學生、教授同智庫嘅中國成員都要獲得授權先可以同我哋會面，呢個情況係我哋之前冇預計到嘅，而且呢種情況仲係持續增加緊。」

佢繼續講，「我哋本來以為，經過咗四年嘅經濟活動低迷，尤其係2022年，會係一個經濟強勁反彈嘅年份。但事實並非如此。」

喺本周三，墨卡托中國研究所MERICS做咗一項對專家嘅調查，結果67%嘅受訪者認為，「為咗安全而犧牲增長同社會成本」會係中國政府喺2024年最可能採取嘅方針。

不過，喺周二嘅達沃斯世界經濟論壇上，國務院總理李強向在場嘅商界領袖同「老朋友」發出呼籲，話中國市場「唔係風險，而係機會」。佢仲引用周三確認咗嘅2023年中國經濟增長5.2%嘅官方數據，試圖為中國經濟復蘇進行辯護。

托萊多對中國經濟反彈嘅真實性提出咗質疑。佢指出，中國房地產市場低迷同「消費冇預期增長」嘅事實，係一個警告。托萊多話：「有啲分析師唔相信呢個數字。對於5.2%嘅增長率，我哋表示質疑，等睇下會發生乜嘢事。」

另一邊廂，《人民日報》今（19日）以官方筆名「和音」，發表題為「中國是最值得信任的」嘅評論文章。

文章通篇唱好中國，首先就話「中國經濟穩健前行，持續為世界經濟發展提供強大動力﹔中國堅持開放發展，持續為各國分享中國機遇創造條件﹔中國倡導普惠包容的經濟全球化，持續為完善全球經濟治理貢獻智慧」。

跟住就批評外國，話「當前，世界經濟復蘇脆弱乏力，增長動能不足、發展鴻溝擴大等挑戰十分突出，地緣沖突對全球發展的沖擊日漸顯現。」

文章最後表示，各方唯有以誠相待、相向而行，才能夯實信任之基，收獲更多合作之果。中國將在集中力量辦好自己的事的同時，堅持團結合作、開放共享，攜手各方完善全球經濟治理，推動世界經濟復蘇行穩致遠，「事實証明，中國是最值得信任的」。《I》