自由民主國家對中國「去風險」動作日益加強，對中方可能嘅報復行動亦越黎越有準備。有消息指，歐盟最快將於今年中，對中國電動車開徵反傾銷關稅。至於近期頻頻傳出，中方成功繞過華府禁令，獲得美國管制技術嘅情況，美國官員誓言加大懲罰力度，力圖堵塞漏洞。

彭博引述消息話，中國國務院總理李強同歐盟委員會主席馮德萊恩，周二喺瑞士達沃斯世界經濟論壇期間嘅會面上，分別表示會對嚟自對方嘅電動車同烈酒進行進口調查。

報道提到，而家未知中國對由歐盟進口嘅白蘭地加嘅臨時關稅嘅具體時間，但可能最早3月開始實施，而歐盟就最快6月開始，會對中國進口嘅電動車施加額外臨時關稅。

歐盟去年宣布對嚟自中國嘅電動車進行進口反傾銷調查，引起市場憂慮。中國本月早啲時候公布，會對由歐盟進口嘅白蘭地同部分烈酒進行反傾銷調查，呢個舉動被視為中國對歐盟嘅反制措施。

彭博引述知情人士話，對於中國推出貿易反制措施，歐盟唔係太驚訝，但事前冇跡象顯示白蘭地酒會成為目標。歐盟而家預計，中國唔會再有更多反制行動。

據了解，中國今次針對白蘭地酒嘅反傾銷調查，主要係涵蓋嚟自法國嘅烈酒，而法國被指係推動歐盟對中國進口電動車發起反傾銷調查嘅成員國。

消息人士又表示，繼達沃斯世界經濟論壇之後，歐盟同中國兩邊仍有機會就貿易爭端再會面，估計係2月舉行嘅世界貿易組織部長級會議上會再次碰頭。

與此同時，美國商務部負責出口執法嘅助理部長Matthew Axelrod周二晚上喺紐約大學法學院嘅一個活動上講，美國對違反出口管制行為嘅處罰可能會開始接近對海外賄賂嘅處罰規模。

Axelrod話，佢認為美國正處於一個轉折點，可以預期未來會見到更多對公司嘅大額處罰。美國已經實施咗一系列新嘅出口管制措施，試圖阻止俄羅斯獲得可能用嚟推進烏克蘭戰爭嘅物料，同時阻止中國獲得可能有軍事用途嘅先進半導體。

喺實施經濟制裁嘅同時，擴大出口管制制度已經變成美國國家安全政策嘅一個重要組成部分，但從歷史上睇，對違反出口管制嘅懲罰相對輕微。Axelrod周二仲宣布新措施，希望令企業更容易主動報告自己嘅違規行為。《I》