恒指昨日重挫2.16%，失守16000點關。分析指，國安法通過咗三年半，港股共跌近10000點，相當於令香港損失約十萬億。《信報》評論直言，面對咁樣嘅事實，反映市場「用錢投票」。

香港親建制經濟學者雷鼎鳴，曾經係2014年佔中期間，指出當時港股兩日下跌745點。而港股總市值二十多萬億，當時恒指係二萬多點，推估恒指每跌一點，便等於名義財富消失咗十億港元，認為「佔中」兩日就令香港損失七千多億元。

雷鼎鳴當時稱，為方便計算及為免在枝節爭拗，將七千多億打個五折，相當於三千五百多億元損失，等於平均每個港人承受五萬元的損失。

喺連登討論區上，有網民以相同方式計算，發現國安法至今港股共跌近10000點。若按照佢嘅計算方法，相當於香港帳面財富蒸發十萬億。就算將十萬億打個五折，平均每位港人仍承受高達七十萬元嘅損失。

與此同時，《信報》今（18日）以「23條的『靈活性』與呵護市場信心」為標題發表評論。評論指，恒指昨開市初段原本冇乜嘢異樣，但於10點20分後突然插水，全日下瀉2.16%，主因係早上十點幾，特首李家超出席行政會議前向傳媒強調，《基本法》23條立法要有「靈活性」，「可應對千變萬化，甚至目前未必想像到的新手法。」認為呢種講法令投資者擔心香港進一步「人治化」。

評論引述法律界人士指，所謂「立法要有靈活性」嘅講法「相當新鮮」，因為法律最重要嘅係「白紙黑字」有所依循，讓各界清楚知道違法界線，亦是法治根基之一。但所謂嘅「靈活性」令人擔心意味相關法律日後有很大演繹空間，由執法當局自行裁斷，「龍門任搬」。

評論認為，假若23條很有「靈活性」，外商憂慮難以掌握在港做生意嘅安全界線，例如進行市場調查、沽空股票、發表看淡報告等，若無具體嘅白紙黑字條文保障，恐隨時被指違法。「或許會加速資金外流，股市將更加『乾塘』」。

評論引述移民顧問業界人士指，有意移民嘅「黃絲」已走得八八九九，原以為移民潮暫告一段落，但近期竟多咗「藍絲」紛紛諮詢移民事項。其中一個觸發點係教育局上月發布《視學周年報告》，列出中小學落實國安教育一系列罪狀，包括「教師過於側重教導知識」及「學生唱國歌聲音細弱」。直言藍絲父母們當然不會不愛國，但若「老師教導知識」同「學生唱歌細聲」都係罪，難怪父母們會對本港教育前景漸失信心，產生移民念頭。

評論最後稱，現今本港經濟仍待興、追落後，陣腳未穩。當局若真係要重振經濟同吸引外資，就要盡量呵護市場信心，否則投資者及商界人士就算再樂觀，恐亦難以睇到「由治及興帶來嘅好處」。《I》