北京2020年喺香港強推《港區國安法》之後，本港面臨外資大撤離、移民潮不斷嘅慘況。政府過去4年有3年出現財赤，財政司司長陳茂波指今年再錄得赤字「在所難免」。對此，中大商學院亞太工商研究所名譽教研學人李兆波認為，政府需調整國安法，令外資重返。但民建聯陳勇批評李嘅言論係「偽名題」，又「提醒」學者「以事實來說話」 、「唔好抹黑香港」。

《華爾街日報》日前報道，隨住香港收緊國家安全限制、整肅外資企業，加上中國經濟放緩同埋中美關係緊張，喺港嘅外企加快撤離。一啲外企高管直言，香港同中國之間嘅界線已經變得模糊不清。Serendipity Capital創辦人Rob Jesudason話，香港而家被視為中國嘅延伸。

隨住做生意環境變差，外商銀行、投資公司同科技企業等喺香港嘅企業開始撤走，當中又以美國企業最明顯，喺港營運嘅美國企業數量連續四年下跌。官方統計顯示，2022年6月喺港美企家數降到1258家，創咗2004年以嚟最低水平。

2023年外商撤離情況持續進行，三間美國同英國嘅盡職調查公司正將員工撤出香港。加拿大退休基金安大略省教師養老金計劃委員會，取消咗設喺香港嘅一個選股團隊。總部喺美國加州嘅印刷電路板製造商TTM Technologies都已經離開香港。

而港府由2019/20年度至2022/23年度，四個年度錄得三年財政赤字。財爺陳茂波去年二月《財政預算案》預料最快下年度（2024/25年度）恢復盈餘。

但係，陳茂波去年十二月，喺立法會財經事務委員會總結整體經濟狀況時講，本港2023年經濟同資產市場表現比預期差，政府地價同印花稅收入下跌，預計今年赤字超過一千億元，比去年二月估計嘅五百四十四億多。佢又話下年度再出現赤字「在所難免」。

李兆波之前接受《明報》訪問，話政府多次延後恢復財政盈餘嘅預測，情況唔樂觀，就算政府曾提升股票印花稅率同加徵博彩稅等，未能短期內增加收入，令收入基礎出現問題。佢認為，「現階段政府要思考點樣吸引外資，舉例港府需喺國安法調整，令外資重返」。

陳勇昨（10日）喺立法會回應李兆波嘅言論，話「2019年嘅『黑暴』就好似戰亂一樣」，混亂嘅社會環境嚴重影響外資嚟港投資嘅意願，唔少外資都向佢表示喺國安法實施後先終於放心營商，強調「香港國安法對經濟只有保駕護航嘅作用，對經濟嘅（負面）影響係子虛烏有」。

佢話國家安全係吸引任何經濟活動嘅前提，形容國家安全好似數字中嘅「1」，其他因素同經濟活動就似跟住嘅「0」，「冇1，後面幾多個0都係0」。

陳勇又「提醒」從事學術研究同市場分析嘅從業員要「以事實嚟講話」，話分唔清楚李兆波嘅言論係「真糊塗」，呼籲學者同市場分析從業員「就算你唔想幫香港宣傳，都唔好抹黑香港」，反而要喺各自範疇裏面「講多啲香港聯通國家製造嘅價值同機會」。《I》