國家主席習近平強力清洗軍方高層，過去半年肅清咗高達15名軍方高層。最新消息傳出，前中央軍委會副主席許其亮喺屋企被帶走，而家正接受調查。而前中共總書記胡錦濤兒子、麗水市委書記胡海峰，都失咗蹤。

住喺澳洲嘅知名華裔女作家李雋8號，喺社群平台X發文，話收到朋友嘅信：「昨晚爆點：原軍委副主席、空軍上將許其亮家中被帶走，正在接受調查。」但佢強調：「至於這個『昨晚』是哪晚就不知道了。總之是近期。」

有關許其亮出事嘅消息，幾日前喺網上已經傳開。海外時政評論員周曉輝喺4號發文，話佢由「軍中朋友」嗰度聽到，習近平準備查辦許其亮，話喺胡錦濤喺中共二十大會場被公開架走，李克強神秘死亡之後，效忠胡錦濤嘅許其亮被肅清並唔出奇。

許其亮自2007年9月任中國空軍司令開始，之後成為軍委會委員，2012年升做軍委會副主席、政治局委員，2017年連任。但係喺2022年10月嘅中共二十大上，72歲嘅許其亮卸任，但同齡嘅軍委會副主席張又俠卻留任。

因為許其亮係胡錦濤栽培提拔上嚟嘅人，加上胡錦濤喺二十大上被強行架走嘅事激起咗好多人嘅憤怒，所以唔排除有啲忠於胡錦濤嘅人對習近平不滿，甚至可能會採取反習行動。

與此同時，胡海峰近日傳出升官之後，竟然冇現身主持麗水市委理論學習中心組嘅專題學習會，反而係由麗水市委副書記、市長吳舜澤主持。之前，麗水市委涉及學習「習思想」嘅重要會議，都係胡海峰主持同埋發言。喺微博搜尋「胡海峰」，搵唔到任何內容，顯示佢嘅名字已經被列為敏感詞，禁止網友討論。

眼前中國政局亂成一團，軍方高層集體出事，各種謠言滿天飛。《彭博》喺6號引述知情人士講，中國火箭軍同整個國防工業內部嘅貪腐情況嚴重，美國情報評估人員列咗幾個中國軍隊貪腐嘅例子，包括飛彈裝水唔係燃料，同埋中國西部大範圍飛彈發射井發唔到射。

美方評估，中國軍隊嘅貪腐已經侵蝕咗佢哋整體作戰能力嘅信心，特別係火箭軍，而且因為貪腐嘅普遍性，會令中國喺未來幾年內採取重大軍事行動嘅可能性變得更小。

中國海軍司令部前中校參謀姚誠發文指，目前火箭軍軍心渙散，超過一半嘅校尉級軍官想轉業。火箭軍進行全面檢查整頓時，發現咗好多問題，一啲加注液體燃料嘅火箭彈真係發現裡面有水，戰略飛彈發射井嘅井蓋長期冇維護導致井蓋打唔開。

更加重要嘅係，洩密問題仍持續發生，據悉連呢份檢查報告居然都俾美國攞到咗，「我透過國內朋友核實，這2個問題確實存在」。《I》