中共中央對外聯絡部部長劉建超9日喺美國表示，中國唔尋求改變現有嘅國際秩序，又話各國都希望中國同美國帶頭解決全球性問題，仲否認中國有任何形式嘅「戰狼外交」。

中國近年嚟喺外交上嘅強勢同挑釁姿態被國際社會視為「戰狼外交」，已經被免職嘅前外長秦剛去年3月介紹中國外交政策時曾經講過，所謂「戰狼外交」係個話語陷阱，「但當豺狼擋路、惡狼來襲，中國外交官必須『與狼共舞』，保家衛國」。

劉建超9號喺紐約出席智庫外交關係協會（CFR）紀念中美建交45周年嘅活動中，引用中國領導人習近平講嘅話：「中國不和任何國家打冷戰熱戰」。佢話，「亞洲人民有自己的相處之道，就是和平高於一切，並尋求和平解決所有爭端」。

劉建超用流利英文表示，「中國唔尋求改變現時嘅國際秩序。我哋係現時世界秩序嘅建設者之一，並且喺其中受益」。佢進一步指出，「隨著世界進入動盪變革期，各國人民都期望中美帶頭解決更多全球性問題」。佢提到咗上個月喺杜拜舉行嘅聯合國氣候變化綱要公約第28次締約方會議上嘅合作。

當問到中國嘅做法有冇改變時，劉建超話：「我唔太相信有任何形式嘅戰狼外交，也不存在重返戰狼外交嘅問題。」劉建超嘅言論同中國外交官過去嘅鷹派言論大相徑庭，去年11月習近平同拜登喺美國加州會晤之後，中美緊張局勢略有緩和，尤其係兩國軍事聯絡得以重建。

劉建超喺台灣問題上嘅回應都好有分寸，可能係因為北京正急於解決國內經濟問題。劉建超話，「台灣問題係中國嘅『紅線』，希望美方認真對待唔支持台獨嘅表態並履行佢哋嘅承諾」，但佢拒絕回答北京將點樣回應本週台灣大選可能嘅結果。

「咁啱得咁橋」，中國官媒《新華社》今（10日）發文，批評西方媒體「故意歪曲」中國搞戰狼外交。官媒文章直接點名《路透社》報道時「故意歪曲」，發表「迷惑性較強的誘導」，讓對中文語境唔熟悉嘅外國受眾産生「誤解」，加深對中國嘅偏見。

文章稱，戰狼外交由一開始就係一些西方媒體炮制出來嘅概念，指責西方媒體「不時歪曲」中方表態以期形成邏輯閉環，「想借文字遊戲達到制造衝突、吸引眼球、在國際輿論中抹黑中國的目的。」《I》