亞洲盃決賽喺1月12號至2月10號喺卡塔爾舉行，除咗香港隊參賽，中國隊、爭標熱門嘅日本同南韓隊都會出戰。已經到達多哈嘅國足將喺星期六（13號）晚上10點半喺分組賽首戰對塔吉克。內媒《足球報》報道，除咗正常嘅備戰同調整之外，國足球員仲會觀看央視反腐專題節目片段《持續發力縱深推進》，捲入球壇貪腐案嘅前中國足協主席陳戌源、前足協黨委書記杜兆才、前任國足主教練李鐵會喺節目中「認罪」。

當中最受矚目當然就係李鐵喇。李鐵喺2022年11月喺教練培訓班途中被帶走接受調查，至去年8月調查終結，佢被指涉嫌收受賄賂、行賄、單位行賄、非國家工作人員收賄、對非國家工作人員行賄。李鐵喺鏡頭前懺悔。呢個消息引起熱議。

報道引述消息指出，國足觀看反腐敗紀錄片，一方面係進行警示教育，因為國腳係中國足球運動員之中嘅佼佼者，呢種警示教育好有價值同意義；另一方面，中國足協同國家隊都希望喺行業震盪嘅現階段，所有國腳都能夠真正認識到自己身上嘅責任同重擔，透過自己嘅努力，為中國足球嘅穩定同發展做出貢獻。

喺《連登討論區》上，有本港網民分析：「中國人咁鐘意要人拍片認錯俾人睇，作用係話你知你衰咗就要你喺咁多人面前出醜將你盡情羞辱，同以前遊街示眾一樣」。亦有網民認為：「睇完都唔想踢，老左隨時比人拎黎制旗」、「人地就睇片學戰術，佢哋就睇認罪片，增強團隊精神？」、「嘥時間睇片不如操多一節或者休息啦」等。

不同於本港網民，內地網民就似乎更關注李鐵嘅狀態，當中好多人認為李鐵同出事前冇乜分別，尤其係頭髮依然整理得好「企理」，柔順。值得一提嘅係，李鐵向嚟以長嘅瀏海示人，喺擔任總教練期間，李鐵一直有喺場邊吹佢嘅瀏海嘅習慣。據悉，李鐵已經28年冇換過髮型，習慣吹瀏海，係因為佢早年喺巴西時期冇錢理髮。

喺該反腐大片中，就出現咗李鐵「經典吹瀏海」嘅鏡頭，最新畫面亦顯示佢嘅瀏海還在，有網民調侃：「保住瀏海是大事」、「還真給這個鏡頭」、「為什麼沒把李鐵頭髮剃了」、「不說剃個光頭吧，至少要剪個寸頭吧」、「形象問題，能隨便改嘛，真是的」、「另類從央5到央1的男人」。

亦有人指出，李鐵仲未被判刑，因此冇被剃頭係正常嘅，「至於以後，會不會進監獄，還是去特別監獄，這我就不知道了，可能瀏海還會留著吧」。另有網民表示，由李鐵嘅表情睇黎，佢根本冇後悔，「這是懺悔的姿態嗎？我還以為是在接受訪談呢」。《I》