《華爾街日報》昨（4日）嘅報道，以「飢荒」來形容香港如今嘅IPO（招股上市）市場。報道指，港股長期低迷、外國投資者大量出走已經令好多公司好難喺香港上市，對需要籌集資金嘅企業造成打擊。對於如今中國經濟面臨嘅困境，身為七常委之一、習近平「心腹」嘅蔡奇畀出解方，就係要「不斷把習近平新時代中國特色社會主義思想學習宣傳貫徹引向深入，加強正面宣布及輿論引導，唱響中國經濟光明論」。

多年嚟，身為亞洲金融中心嘅香港一直係嚟自中國同更廣泛地區嘅公司進行國際融資嘅首選之地，幾年前幾乎可以同紐約市場相媲美。但而家，根據Dealogic嘅數據，2023年係香港交易所上市嘅公司總共只募集到59億美元，係20多年嚟最低嘅。相比之下，就算係2020年，即新冠疫情爆發嘅第一年，企業係香港進行IPO同埋二次上市嘅總融資額亦超過510億美元。

中國內地嘅IPO市場曾經更加活躍，但之後發生咗轉變。自2023年8月以嚟，中國證券監管機構已經暫停咗大部分上市審批，以防止新股發售令本就疲軟嘅國內股市進一步承壓。

中國證監會表示，截至2023年底，呢個委員會受理咗72家赴香港或紐約上市公司嘅申請，未發生任何延誤。又話冇暫緩或者暫停任何國內IPO申請。證監會聲稱對IPO申請嘅審核節奏充分考慮市場情況。更保證今後會繼續加強監管機構之間嘅溝通協調，提高IPO申報流程嘅質量同效率。

2023年中國新股嘅表現已經非常差，投行人士認為情況進一步大幅惡化嘅可能性相對較小。港股連續第四年收跌，係其歷史上持續時間最長嘅低迷期之一。交易商們只預計會出現緩慢同逐步嘅復甦。

瑞銀(UBS)亞洲股票資本市場聯席主管Selina Cheung表示：如果中國國內消費明顯改善、中美地緣政治緊張局勢緩和以及中國證券監管機構持續批准更多IPO交易，咁市場可能會迅速反彈。花旗集團內部人士表示：「要想IPO市場得到改善，並唔需要投資者突然轉為睇好中國，佢哋唔咁悲觀就已經夠啦。」

如果睇番中國官員嘅發言，市場想唔咁悲觀都好難。中共中央政治局常委﹑中央書記處書記蔡奇，周三（3日）出席全國宣傳部長會議時表示，要「緊緊圍繞推進中國式現代化這個最大的政治，牢牢把握新時代新的文化使命」；要圍繞增強信心、凝聚共識構築主流輿論新態勢，持續加強正面宣傳和輿論引導，唱響中國經濟光明論。

事實上，北京當局已經所謂「唱衰經濟」，提升為國安問題。微博上個月通知網紅唔好發表唱衰經濟嘅言論，否則將觸及紅線；國安部官方微信亦發布「國家安全機關堅決築牢經濟安全屏障」文章，聲稱經濟安全係國家安全嘅重要組成部分，為維護其他重要領域安全提供有力支撐。

國安部指，維護經濟安全，要堅持社會主義基本經濟制度不動搖，不斷完善社會主義市場經濟體制，提高國家嘅整體經濟實力、競爭力和抵禦內外各種衝擊與威脅嘅能力，重點防控好各種重大風險挑戰，保護國家根本利益不受傷害云云。《I》