周庭接受日雜誌訪問首次爆國安騷擾手段  分析:正複製大陸國安監視手法
周庭接受日雜誌訪問首次爆國安騷擾手段 分析:正複製大陸國安監視手法

前香港眾志副秘書長周庭,去年12月喺社交媒體就其國安案件宣佈棄保不再回港。日本娛樂雜誌《日刊SPA!》刊登記者倉田明子專訪周庭嘅內容,公開咗周庭心中嘅「驚懼」,並進一步揭示國安警對佢嘅滋擾手段。

    

訪問中,周庭表示2023年初收到加拿大一間大學嘅取錄通知,佢拿著取錄書向國安申請出國留學。記者問佢有冇覺得開心?周庭話:「無,申請咗之後,國安對我嘅審查更加嚴格,2023年中一次被國安審問咗6個鐘,國安問我嘅朋友、家人,亦問我嘅工作。」之後仲俾逼寫「悔過書」,喺「悔過書」入面寫「對於之前嘅民主運動感到後悔,之後唔會再參加」;國安指示佢,「民主運動」要改成「社會運動」。

    

港警喺12月28日向傳媒指,周庭因未依時間向警方報到,會對佢「終身追捕」,同日早上警方「邀請」周庭父母去警署協助調查。

    

記者問周庭:「到達多倫多,不安感有冇減少?」周庭回應話:「唔可以咁講,嚟咗多倫多之後收到國安警兩次WhatsApp訊息。一次問我『你安全到埗?』之後有一次問我:『有冇同黃絲聯絡?』」周庭話喺訪問中唔指明國安警喺邊個日期WhatsApp佢,但佢講「國安之所以批准我嚟多倫多讀書有兩個理由,一係收集海外嘅情報,二係作為一種政治宣傳。」

    

周庭喺訪問中指出,喺佢公開遠走之後隔日(12月4日),喺2019年10月1日中槍嘅示威者曾志健,就喺TVB嘅節目《有法安國》表示對示威感到後悔,同樣中共亦想喺佢身上宣傳「一位前香港政治人物已獲得自由,作為中國人民出國留學。」

    

周庭喺其他訪問中提到,佢係香港開唔到銀行戶口、搵唔到工、租唔到屋,根本冇辦法喺香港生活。喺呢份雜誌訪問入面,佢分享喺香港期間嘅生活,話佢唯一可以做嘅係教日文、剪輯影片同用菲林相機影相嚟打發時間。佢特別提到2022年同一啲冇政治背景嘅攝影朋友出外攝影嘅時光好開心,因為攝影一定要出門。

    

周庭向記者講,而家縱使身處多倫多,心情都唔能夠放鬆,特別係國安警向多名海外嘅政治人物懸紅通緝,令佢擔心不已。佢透露唔時睇《進擊的巨人》,動畫中嘅主角為自由而戰,佢從中得到慰藉。周庭多次被記者問到修讀嘅科目亦三緘其口,佢話如果透露咗科目就會被知道大學名字,就知道佢身處嘅位置。

    

記者最後直接問周庭「會唔會黎日本?」周庭話好想黎日本,但佢預計:「我即將成為懸紅通緝嘅人啦,在未能確保安全同自由之前,我會先喺多倫多讀書。」

    

《自由亞洲電台》報道,前國際特赦組織中國研究員潘嘉偉分析指出,由周庭、鍾翰林嘅個案中,可見北京對待維權人士同維吾爾族嘅類似情形。例如身處海外嘅維吾爾族人士都會收到國安嘅電話,問佢哋問題,目的唔止係搵出海外反共組織,仲包括恐嚇維權人士。

    

潘嘉偉指出,大陸維權人士出獄之後仍然會受到國安嘅嚴密監控同壓力。香港同大陸漸漸接軌,但大陸維權人士嘅處境相對更加惡劣。佢舉例指,大陸國安會不停向業主施壓,令你租唔到地方住;會向學校施壓,令你搵唔到小朋友就讀嘅地方等。

    

潘嘉偉認為,雖然北京想將國安系統植入香港,但過程中仍然有困難。因爲中港兩地嘅文化、歷史背景唔同,而且香港嘅人權情況繼續受到海外關注,所以未必可以即時將香港完全大陸化。

    

研究《港區國安法》實施情況嘅美國喬治敦亞洲法律中心執行主任托馬斯.凱洛格(Thomas Kellogg)指出,鍾翰林已刑滿獲釋,而周庭一直只係保釋候查,但香港國安警對兩人進行「非正式監管」,顯示港府已至少部分複製咗大陸當局嘅做法,「警察國家嘅一啲元素已經被引入香港。」《I》

發佈時間: 2024年01月05日 14:53
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.