去年疫情後，香港旅遊業一蹶不振，高消費嘅外籍遊客少之又少。特首李家超近日大力推動以禮貌態度待客，希望藉此提升香港形象同競爭力。來港跨年倒數、觀看維港盛大嘅煙花表演，係香港吸引遊客嘅一大盛事。點知有「倒米」警員，幫手「說好香港故事」，對一名日本籍遊客惡言相向。

根據網媒 Lhokvre Media 發布影片顯示，2023年最後一晚大約11點半，喺尖沙咀星光行對出，一位日籍男子喺便利店買完飲品返轉頭時，由於警方封區，佢無法前行。呢名男子心急如焚，隔著鐵馬向女友所在方向大喊女友名字「Ayako」等。

一名白衫督察上前建議佢致電，但男子表示佢冇香港電話，並出示日本護照。該督察離開後，男子再呼喚警員求助，希望前往另一邊會合朋友，一位警員編號為60175嘅「藍帽子」警員走過來，男子用英文表示「我女友在另一邊」。該警員用手指着男子，以日文喝斥，「收聲啦！ 」、「再嘈就拉你，懂不懂？ 」等。最後男子無奈做出 OK 手勢作罷。

警員走開後，有其他在場警員向增援隊員稱該男子係醉酒鬧事，最後有警員對男子話「Final Warning」，示意他不可大喊。但該名日籍男子表現十分清醒，更表示冇飲酒，只係想返到文化中心同等候佢嘅女朋友會合，但到最後都冇被放行。

警方喺回應《Yahoo 新聞》嘅查詢時表示，2023年12月31號晚上約11點嘅時候，警方喺尖沙咀梳士巴利道一帶執行人群管制措施。喺維持公眾安全同秩序嘅過程中，一名外籍男子喺人群當中大聲喊叫，警員於是就勸喻該名男子聽從警方指示同埋遵守相關嘅人群管制安排。

警方重申，當晚有好多市民喺現場準備睇煙花；喺人多嘅情況下，警方需要果斷採取有效嘅措施，市民公衆都有責任遵守同配合警務人員嘅指示，一齊確保公共安全同公共秩序。警方對於會唔會檢視事件同跟進相關警員嘅行為並無正面回應，亦無提供警方會點樣配合特首李家超提倡嘅好客、禮貌行動嘅細節。

對於呢件事，有網民話：「那警察用極不禮貌的日文對一個請求幫助的日本遊客講嘢，真是切合新香港警察的形象」、「尊重同盡力幫忙外國人同遊客是基本的待客之道。  片中只見所有警員不是替人解決問題，係叫有問題的人收聲。完全符合國情」、「個遊客一路都好有禮貌，警察卻又兇又屈人飲醉酒」、「笑死，香港警察咁樣對待旅客，仲話說好香港故事，倒米就真」、「我相信果位日本仔一定係返去日本說好香港故事」、「日本人只係禮貌求助，連護照都拿埋出來，换來，兇神惡殺手指指，命令你收声，静静同我企向度」、「香港差佬已經柒出國際衝出香港」等。亦有網民認為「如果日本仔識國語，再上小紅書投訴兩句，成個故事就暖心晒」。