最新一項調查發現，接近38%受訪市民表示如有機會，打算移民或移居外地，較去年同期嘅調查上升超過9個百分點。當中超過14%受訪者表示，打算移民到英國，其次係澳洲、加拿大同台灣。值得留意嘅係，有部分立場屬於「藍絲」嘅市民，打算移居中國內地嘅比例，亦較去年同期嘅調查顯著增加。

香港中文大學亞太研究所12月14日公布咗一項有關香港人移民意願嘅最新民調，呢個調查係喺9月28日至11月9日期間，通過電話訪問708位18歲或以上嘅香港市民進行嘅。

調查發現，有意移民嘅受訪者當中，超過28%表示唔知道或者未決定去邊度，提及最多嘅目的地係英國，佔咗14.2%，之後係澳洲12.2%、加拿大11.0%以及台灣10.6%。

受訪者表示想移民嘅主要本地因素有：香港嘅自由，包括新聞同言論自由或者人權情況變差，佔近18%；其次超過15%嘅人認為係香港政治爭拗太多或政治不穩定；超過14%嘅人覺得香港政制唔民主。至於外地因素，最多人提及嘅係該地居住環境較好或較寬敞佔21.4%，其次係該地自由包括有言論自由等佔14.4%。

調查亦問咗市民對香港社會各方面嘅滿意程度。滿意度最低嘅係政治環境，只有7.1%滿意，其次係教育制度16.2%，居住環境18.2%、經濟前景18.5%以及社會福利30.3%。最多人不滿嘅係香港嘅政治環境。

《美國之音》報道，時事評論員譚美德認為，呢項調查嘅訪問時間截至11月9日，而特首李家超喺10月25日公佈嘅施政報告中報告中，首次明確表示會喺香港推行愛國主義教育，令好多家長即時決定為咗下一代而移民。

至於調查顯示有意移居中國內地嘅受訪者有明顯增加，譚美德分析話，最多人選擇去內地嘅原因係物價比較低同居住環境比較寬敞，呢個現象反映香港出現咗一種「民意內捲」嘅情況，就算係支持建制派嘅市民，都唔會留喺香港生活。《I》