路透:五月天遭北京施壓在台灣大選前表態親中 中方認為五月天可影響台灣年輕人選票
路透:五月天遭北京施壓在台灣大選前表態親中 中方認為五月天可影響台灣年輕人選票

台灣知名樂團「五月天」於12月初遭指控於中國內地開演唱會時假唱,中國官方機構介入調查至今尚未公布結論。《路透社》報道,北京當局以此項調查威脅五月天,要求佢哋喺台灣大選前公開表態支持北京嘅「一個中國」論調,並配合中國對台宣傳。

    

報道指,根據佢哋攞到嘅台灣內部安全備忘錄顯示,中國國家廣播電視總局要求五月天公開承認「台灣係中國一部分」嘅說法,同時配合中國對台宣傳。呢份來自本月稍早嘅備忘錄,引述台灣有關單位蒐集相關中國政府活動嘅情報資料。

    

報道提到,有兩名正調查呢件事嘅台灣安全官員表示,中國當局為咗施壓,喺本月宣布對五月天展開調查。五月天之前因為被中國網民質疑假唱而引發關注。一位唔透露姓名嘅知情人士透露,中國當局要求五月天提供未具體化嘅「政治服務」,但五月天冇答應。

    

呢位知情人士表示,中國當局威脅要調查假唱事件並且開罰,話如果唔合作,就會有代價。目前中國官方未有公佈對五月天嘅調查結果同相關懲罰。有一位台灣官員表示,北京當局認為通過施壓五月天表態,可以影響台灣年輕人嘅選票。

    

對於《路透社》嘅爆料,包括中宣部、廣電總局、國台辦,以及五月天所屬嘅唱片公司「相信音樂」都未有對此作出回應。

    

早前,中國音樂博主「麥田農夫」喺嗶哩嗶哩同微博等平台發佈咗一系列關於五月天嘅影片,佢用音樂軟件評估咗五月天喺上海、北京、倫敦等地舉行嘅演唱會上演唱嘅歌曲,研究主唱阿信(陳信宏)唱歌時氣息嘅穩定性,佢嘅分析結果話五月天演唱會上嘅大量歌曲係靠假唱完成嘅。

    

「麥田農夫」嘅分析影片好快爆紅,並成為中國社交平台上最熱門嘅話題之一。12月4日微博嘅話題熱搜榜上面嘅好多話題都同五月天被指控假唱有關。

    

事件發酵之後,上海市文化和旅遊局執法總隊表示,已經攞到咗五月天上個月喺上海舉行嘅演唱會嘅原始音頻,會進行研究,並將擇日公佈調查結果。官媒《人民日報》都對呢件事發表社論,譴責假唱行為。網上有啲中國小粉紅都利用呢件事,趁機攻擊五月天係台獨藝人。

    

五月天所屬公司「相信音樂」否認假唱指控,話呢啲言論「完全是惡意攻擊,造謠中傷」,表示五月天喺巡迴演出中絕對沒有任何假唱行為。

    

喺中國內地,假唱係違法行為。根據中國《營業性演出管理條例》,舉辦或參加營業性演出嘅團體同個人唔可以假唱欺騙觀眾。《演出業演藝人員從律管理辦法》規定,演藝人員唔可以喺營業性演出中以假唱、假演奏等手段欺騙觀眾。違反呢啲規定嘅藝人可能受到1年、3年、5年或者永久等唔同程度嘅行業聯合抵制。《I》

發佈時間: 2023年12月28日 15:37
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.