《美國之音》今（22日）報道，美國國會暨行政當局中國委員會（CECC）主席、共和黨眾議員史密斯（Chris Smith）同委員會共同主席、民主黨參議員默克里（Jeff Merkley）上星期四（21日）發公開信畀美國國務卿布林肯，要求佢根據《香港自治法》同《香港人權與民主法》，對有責任懸賞海外活動人士嘅中港官員實施制裁。

信中提到，2023年12月14日，香港當局喺中共影響下，對一啲被指控違反《港區國安法》嘅海外活動人士發出5份通緝令，仲懸賞100萬港元。當中有兩位被通緝嘅人，一位係美國公民，另一位係美國居民。

佢哋認為，香港當局嘅行為嘗試恐嚇同鎮壓喺美國進行和平政治活動嘅美國公民，令人憤慨，不能不採取行動。要求美國政府迅速行動，對呢啲跨國鎮壓行為嘅肇事者實施制裁，同時敦促布林肯同國會合作，解決跨國鎮壓問題。

信中提到，1997年香港移交畀中華人民共和國嗰時，北京當局承諾喺「一國兩制」框架下，維持香港嘅自治同民主。但即使有呢個承諾，以習近平為首嘅中共仍然實施嚴厲嘅司法改造，削弱咗香港執法部門嘅獨立性。中共透過其香港當局作為代理人，毫不掩飾地侵蝕香港嘅公民自由和政治自由。

CECC主席史密斯、共同主席默克里、眾議院美中戰略競爭特設委員會主席加拉格爾（Mike Gallagher）、委員會首席民主黨議員克里希納莫提（Raja Krishnamoorthi）一齊簽咗呢封信。

佢哋指出，2019年夏天嘅合法民主抗議活動遭到中共喺2020年頒布、旨在封殺香港反對聲音嘅嚴厲《港區國安法》打壓，並特別提到《港區國安法》有關於域外管轄權嘅規定，為香港當局打擊世界任何地方嘅反對者，提供法律途徑。

自從北京強加《港區國安法》畀香港以嚟，美國政府認定中方公然違反對香港自治同民主嘅承諾。作為回應，美國通過《香港自治法》，同時發佈第13936號行政命令，追究侵蝕香港自治權嘅人嘅責任。

美國當局誓言，絕對唔可以對中方將鎮壓長臂伸向美國領土、威脅居住喺美國民眾嘅公民自由視而不見。

喺呢個背景下，信中要求布林肯喺2024年1月19日之前確定以下香港同中共安全官員是否符合《香港人權與民主法》、《香港自治法》同《第13936號行政命令》規定嘅制裁標準。

被點名嘅中港官員有：律政司司長林定國、警務處處長蕭澤頤、警務處助理處長趙詠蘭、警務處助理處長王忠巡、警務處高級警司、刑事檢控專員楊美琪同中央駐港維護國家安全公署署長董經緯。《I》