中國外交部長王毅昨（20日）同菲律賓外交部長馬納羅（Enrique Manalo）通話時警告，如果菲律賓喺南海「錯判形勢，執迷不悟」，甚至「與不懷好意的外部勢力相互勾聯」生事生亂，中方必將堅決回應。馬納羅就話，希望用「雙方均能接受嘅方式」嚟處理分歧。

菲律賓海岸防衛隊在本月10日於南海「南沙群島」（Spratly Island）「第二托馬斯礁」（Second Thomas Shoal），即係中方所稱嘅「仁愛礁」附近，向擱淺於沙灘上嘅菲國登陸艦「馬德雷山號」（BRP Sierra Madre）執行海上補給任務，但菲方指控有一隻補給船遭遇中方「惡意撞擊」，一隻船就因引擎嚴重水浸而失去動力。不過中方就指控事件「完全是由菲方挑起」。

中國外交部20號深夜喺官網發布咗王毅同馬納羅嘅通話內容，兩邊都有上述表態。王毅聲稱，現時中菲關係面對嚴峻挑戰，根源係菲律賓「改變了迄今的政策立場，背棄了自己作出的承諾，不斷在海上挑釁滋事，損害中方的正當合法權利」。中菲關係已經「站喺十字路口」，面對「點揀路」嘅決定，菲方「一定要謹慎行事」。

佢又話，勸菲律賓「不要沿著錯誤的方向走下去」，而應盡快回到「正確的道路上」。當務之急係妥善處理同管控好當前海上局勢。中菲係一衣帶水嘅鄰居，對存在嘅爭議應該「商量著辦」，「這不僅是鄰國之間行之有效的相處之道，也是中菲關係得以轉圜的有益經驗。」

王毅警告，中方始終致力於通過對話協商解決分歧，維護海上穩定。但如果菲方「錯判形勢，執迷不悟」，甚至「與不懷好意的外部勢力相互勾聯」，繼續生事生亂，中方必將依法維權，堅決回應。

根據公布嘅內容，馬納羅闡述咗菲律賓對仁愛暗沙問題嘅立場，話菲律賓希望用雙方均能接受嘅方式處理分歧，推動緊張局勢降溫，避免衝突。佢願意同中方加強對話，發揮「海上問題溝通機制」嘅作用，一齊搵方法解決問題。公布提到，雙方同意儘快舉行「南海問題雙邊磋商機制會議」，並為此積極創造條件。

而菲律賓國防部長鐵歐多洛（Gilberto Teodoro）於同日對中方予以強烈駁斥，強調「只有北京相信佢自己講嘅說話」。佢表示，「事實同真相係，世界上冇任何一個國家，完全支持中國對整個南海嘅主權主張」。又指中國正試圖讓其他國家屈服於其將整個南海當作內部水域嘅片面主張，「想將南海變成中國嘅一個湖泊」，片面改變聯合國海洋法公約（UNCLOS）同國際法。《I》