繼早前傳出中國前外長秦剛已於今年七月（被）自殺死亡嘅消息後，獨立新聞網站《亞洲哨兵》（Asia Sentinel）引述多個消息來源報道，中國政府對火箭軍嘅調查已經至少拘捕70人，儘管表面上嘅理由係為咗肅貪，但當局擴大調查嘅另一主因，係因為包含秦剛在內嘅要員同高階將領疑似將導彈機密洩漏畀美國。

《亞洲哨兵》報道稱，多個消息證實今年三月國家主席習近平訪俄時，俄羅斯總統普京向習近平透露，秦剛參與咗將中國導彈秘密洩漏畀美國嘅行動。秦剛6月25日最後一次出現喺公眾視線，喺7月25日被正式免去咗外交部長嘅職務，而火箭軍前司令李玉超都喺同一時期被捕，加深各界懷疑秦剛落馬疑同火箭軍遭調查有關。

報道指，中國前國防部長李尚福亦遭有關單位拘留，就相關合約同供應商問題訊問，以供解放軍喺採取任何軍事行動前，先清查手中嘅飛彈與高科技武器。

加拿大地緣政治咨詢公司Cercius Group嘅匿名分析師向《亞洲哨兵》透露，「到而家為止，對火箭軍嘅大規模調查中已經有大約70人被帶走。考慮到火箭軍喺採購同後勤等方面出現咗腐敗問題，所以想清楚地了解呢次大清洗嘅結果，仲需要啲時間。」

呢位分析師表示，北京當局相當重視火箭軍嘅調查。佢解釋話，如果中國決定攻擊台灣，火箭軍會係解放軍最需要嘅部隊。所以審查火箭軍並讓佢哋做好戰鬥準備非常重要，中國政府需要評估指揮鏈嘅政治忠誠度，確保喺緊急情況時可以執行命令。佢仲提到，火箭軍負責平流層武器裝備嘅研發。

佢又表示，解放軍採購同發展結構裏面嘅腐敗，對武器同裝備嘅質量同供應鏈嘅可行性有重大影響：糾正呢個問題對習近平同整個解放軍都好重要，因為有效運作嘅裝備對戰鬥準備係必要嘅。但佢表示，解決呢啲問題需要漫長時間，可能會進一步延遲北京對台灣採取任何軍事行動。

另一位分析師話，因為中國嘅導彈秘密已經洩漏畀美國，中國政府需要花數萬億人民幣重新配置導彈系統。而呢筆錢原本可以用嚟改善中國人民嘅生活。

而關於秦剛是否被處決嘅問題，消息人士話，秦剛可能幾個月前被處決，但《亞洲哨兵》無法證實呢件事。除咗呢兩位消息人士，仲有一位教授認為秦剛可能被處決或者喺監獄中服終身監禁，佢話：「我們可能再也見不到老秦和他可愛的女朋友了。傷心。他們至少將在監獄度過終身。」

據信，鳳凰衛視嘅女記者傅曉田同秦剛喺美國有染。今年四月，也就係普京透露秦剛參與洩露中國導彈機密一個月後，傅曉田返回中國，表面上係話去參加會議，但之後就冇咗消息。

傅曉田喺微博上最後一篇帖文係4月11日發嘅，當時佢發咗幾篇暗示自己同秦剛有私生子嘅帖文。呢啲帖文咁啱喺秦剛被免職嗰陣時出發，而中國政府就一向對微博進行嚴格審查，令外界懷疑，呢啲帖文係為咗分散公眾注意力，掩蓋秦剛倒台真正原因嘅手段。《I》