美國國會參眾兩院上週通過咗價值8860億美元嘅《國防授權法案》，其中數百億美元用於強化美國喺亞太對抗中國影響力。值得留意嘅係，今年法案清楚列明，中華人民共和國包括港澳在內都係「海外敵對勢力」（Foreign Adversary），中港澳並冇因為一國兩制而得到差別待遇。恒隆董事長陳啟宗表示，如今地緣政治局勢緊張，全球碎片化下，「保命保本為上」。

眾議院軍事委員會主席羅傑斯（Mike Rogers）表示，頒布《國防授權法案》嘅重要性前所未有，美國同埋盟友正面臨來自中國、俄羅斯、伊朗、北韓以及全球各地恐怖組織嘅猛烈同快速變化嘅威脅。早前參議院通過呢個法案之後，參議院多數黨領袖舒默（Chuck Schumer）就指出，法案會強化喺印太地區嘅資源，以阻止中國政府嘅侵略，並且為台灣嘅軍隊提供資源支援。

《信報》今（18日）發表社評表示，法案非但鮮明地針對中國，對香港亦將產生深遠影響。美國將本港列為與伊朗和北韓同級，意味着中美競爭所造成嘅地緣政治張力將會進一步衝擊本港市場，經濟前景陰霾難以消散。

社評提到，早前美國國會嘅美中經濟暨安全審查委員會（USCC）發表咗年度報告，其中有一部分講到「港元面臨嘅威脅」，對聯繫滙率制度提出質疑，懷疑香港金融管理局能唔能夠繼續維持港元同美元掛鈎。報告提到，由於資金流出，港元滙率多次觸及弱方兌換保證，令金管局不得不大量買入港元，用咗接近二千八百九十億港元，以確保港元滙率保持喺兌換保證範圍內。

結果，香港銀行體系嘅總結餘急劇下跌，同2021年相比大跌九成。到咗2023年6月，香港銀行體系嘅總結餘跌到只有大約四百四十七億六千萬元，係自二〇〇八年金融海嘯以嚟最低嘅流動性水平。

甚至財政司司長陳茂波都承認，受影響於環球利率持續高企、地緣政治、供應鏈布局調整等因素，香港經濟增長動力受壓，資產市場持續疲弱。展望明年，地緣政局仍然複雜多變，遏抑香港經濟增長速度，政府同資產市場相關嘅收入難以快速恢復，「下年度繼續出現赤字的機會不能抹殺」。

社評直言「香港若要克服地緣政治的挑戰，大前提是中美關係得以顯著改善」，而港府能做嘅係「恰如其份落實一國兩制，讓外界明白香港還是奉行普通法的國際金融中心，盡可能化解美國的敵意。」

另一邊廂，《明報》今日報道，恒隆集團同恒隆地產董事長陳啟宗喺一個論壇上講，而家全球面對緊一啲結構性嘅問題，好似科技發展速度快過社會控制得到、地緣政治同經濟環境嘅變化，同埋世界變得碎片化。佢覺得，而家應該係「保命保本」嘅時候，唔係追求大發展嘅好時機。

陳啟宗指有人稱其為「熊市擁抱者」，佢反指如今中國房地產嘅問題「此熊非彼熊，過去屬於循環性，但現在是結構性，所以還是保命保本為上。」

講到地緣政治局勢緊張，陳啟宗話世界進入碎片化，如果美國退出國際舞台，由中國做「老大」唔一定係好事。一方面，做頭號大哥需要付出好大代價，另一方面，中國未必有足夠條件同能力完全取代美國。

佢又講，中美貿易戰冇輸家冇贏家，更多像係「技術擊倒」（TKO），美國社會可能會有分歧而退出，就好似之前嘅越南戰爭咁。另外，俄烏戰爭令俄羅斯同西方國家關係變差，推動俄羅斯向東發展，例如去印度、中國等地區。