《港區國安法》實施後所掀起大規模移民潮，令到大量人才、資金逃離香港，本港經濟變得一蹶不振。正當香港經濟面臨大逆風之際，近期掀起嘅港人北上風潮令到情況更加雪上加霜，而星滬深等地新出台嘅政策，都好似要踩多香港一腳，唔怪得大量內地網民會嘲笑香港已經成為國際金融中心「遺址」。

《東方日報》今（14日）報道，啱啱過去嘅10月同11月，每個月都有超過500萬人次嘅港人北上。扣除機場、郵輪碼頭等途徑嘅離境人士後，10月份有約530萬人次經羅湖、落馬洲、蓮塘等口岸北上；11月有關數字再增至約580萬人次。最多人出境嘅一日係10月21日，單日有46.6萬人次出境，扣除遠行人士，估計北上消費族料多達35萬人次，。

報道引述深圳媒體指，10月份到深圳嘅港人有355萬人次，消費額為36億元人民幣，折合港幣為39億元，按當地嘅消費統計方法計算，港人10月份喺深圳嘅人均消費為673元人民幣（大約730港元）。《東方日報》形容此情況反映「港人北上消費勢不可擋」、「榨乾香港消費力」。

為吸引港人喺深圳多消費、常消費，深圳唔少店鋪向港人推出林林總總嘅優惠。當中最受注目嘅係，自本月11日起，羅湖區萬象城嘅23間商店試行境外旅客購物離境「即買即退」嘅退稅優惠，即喺萬象城設立「即買即退」集中退付點，讓境外旅客「分散消費、一次領錢」，參加計劃嘅品牌包括Hermès、Ferragamo、Louis Vuitton等國際知名品牌。

有別於以往必須喺離境口岸辦理退稅，此種「即買即退」政策更便利旅客，而相關政策喺北京、上海、廣州、杭州、成都試行，深圳屬第6個試點城市。目前境外旅客嘅實退增值稅為商品價稅合計嘅9%，即係買一萬元人民幣商品計算，旅客可獲退稅900元人民幣，相當於以91折消費。而退稅金額亦設有上限，同一旅客同一日喺同一試點商店購物嘅上限額度為11萬元人民幣。

根據大批「小紅書」用戶連日現場實測，該批名店喺退稅後，計及人民幣貶值效應，部分商品嘅實際售價已經略低於本港門市價格。儘管深圳名牌商品尚未全面平過香港（在退稅後，大多數商品深港兩地售價相若，有些商品仍係香港較平，同時香港名店款式一般比較齊全），但亦意味住喺香港購買奢侈品「肯定平過內地」嘅日子恐怕一去不返（除咗深圳，海南省亦已試行奢侈品免稅政策）。

事實上，自從年頭本港同內地恢復通關，就有好多市民經常北上深圳食飯飲嘢玩樂甚至「跨境買餸」，紛紛讚好當地消費價錢平物美服務好，「性價比」高。而家加埋奢侈品退稅，深圳就好似對本港消費市場「上下包抄」，唔單止吸引普通大眾嘅消費力，連高端購買力都有機會轉移。以前有內地豪客南下廣東道買名牌，日後可能會變成香港人北上萬象城買手袋。

《東方日報》直言，「每逢假日，香港便出現離港消費潮，對本地消費行業當然會有衝擊」。根據政府統計處嘅消費物價情況統計，9月份港人的外出用膳嘅綜合消費物價指數仍有110.6，10月份已縮至96.4，「顯示港人外出用膳開支減少」。同時，10月份的零售業總銷貨價值臨時估計為338億元，其中電器及其他未分類耐用消費品按年下跌12.5%，超級市場貨品下跌5.8%，「亦反映港人北上深圳消費潮出現後，本地生活類消費開支亦在按年收縮」。

與此同時，《信報》今日以標題「星滬深圍毆香港」報道。報道稱，唔少鄰近地區新出台嘅政策，「都好似要跟香港對着幹」。例如新加坡剛跟中國內地達成30天互免簽證協議，有可能將中高端旅客進一步「搶」到星洲。此外，上海日前獲國務院授予80條擴大自貿區開放政策，有機會吸引外資企業繞過香港、直接落戶上海。仲有深圳試點「奢侈品退稅」措施，猶如對本港消費市道「上下包抄」。

被視為「李顯龍接班人」嘅新加坡副總理兼財政部長黃循財上星期訪華，參加中新雙邊合作聯合委員會（JCBC）會議，合共取得24項成果，最引人注目嘅係中新雙方達成30天互免簽證協議，意味內地民眾只需手持護照，毋須申請簽證，便可赴獅城逗留最多30天，咁樣新加坡就成為極少數向中國內地提供免簽證待遇嘅發達國家。

報道指，上述消息對於中國內地民眾無疑係個好消息，但本港唔少商界人士卻視之為警號。事關現時內地人來港仍須申請「往來港澳通行證」，所以待中國同新加坡互免簽證安排落實後，中國內地居民去新加坡某程度上「易過來香港」（特別係華南地區以外人士）。星洲近年喺金融、財富管理等方面已經搶咗香港唔少生意，而家再加上免簽證，估計可以吸引更多內地中高端旅客訪星（況且當地仲有賭場），難怪李顯龍、黃循財等星洲領導人近期笑容愈來愈燦爛。

另一邊廂，國家主席習近平完成考察上海之後，國務院上周發佈《全面對接國際高標準經貿規則推進中國（上海）自由貿易試驗區高水平制度型開放總體方案》，共有80條上海自貿區開放措施，包括「允許金融機構向境外傳輸日常經營數據」、「依法依規引進境外電子支付機構」、「實現資金喺上海自貿區同境外間依法有序自由流動」、「便利金融機構開展跨境資產管理」、「支持跨國公司設立資金管理中心」等。

報道認為，如果上述舉措能夠落實，象徵上海進一步開放及接軌國際，屆時可能會有更多外資企業直接落戶上海、設立大中華地區甚至亞太區總部，唔使再借道香港，會令本港作為中國同國際之間嘅橋樑同樞紐嘅地位繼續受到削弱。

報道表示，雖然新加坡、上海、深圳等地近日嘅新政策，「似乎都跟香港對着幹」。但實際上，各地政府均有責任千方百計推動自身經濟發展，唔一定特地針對某些鄰近地區。「只不過香港近年運滯，面對外部形勢變化不免格外敏感，有時候覺得被全世界圍毆。」

《信報》最後質問，「昔日本港賣點包括自由、開放、國際化、法治、廉潔等等，這些優勢還剩下多少？假若香港跟內地普通城市無異，世界各方的企業和旅客為什麼要來香港？」又稱特區政府官員有必要好好審視這些問題，並交出能解決問題的答案，否則「別怨被內地人譏諷為『遺址』」。《I》