《美國之音》12日報道，美國共和黨籍參議員魯比奧（Marco Rubio）同國會及行政部門中國問題委員會（CECC）主席、共和黨籍眾議員史密斯（Chris Smith）喺星期一（11日）聯合撰文敦促國會，盡快通過《香港經濟貿易辦事處認證法案》，送交總統簽署生效，撤銷香港駐美經貿辦（HKETO）嘅外交地位。

兩人係法案嘅共同提案人。佢哋表示：「香港曾經係東亞嘅自由燈塔，但嗰個香港唔再存在。為咗啲為恢復香港自由而努力同受苦嘅人哋，我哋一定要正視當前嘅壓迫現實，調整我哋嘅政策。」

美國國會參眾兩院嘅外交委員會分別喺今年7月同12月通過咗該法案。法案授權美國行政當局，如果確認香港唔再享有高度自治，可以取消對香港駐美經貿辦嘅特權同豁免待遇，仲禁止聯邦機構同佢哋喺宣傳工作方面進行合作。不過國會有好多待審議法案，暫時都唔清楚參眾兩院會幾時安排法案進行表決。

港府喺美國華盛頓、紐約同舊金山設有三個經貿辦公室（Hong Kong Economic and Trade Offices，簡稱HKETO）。三個經貿辦公室都享有外交特權同豁免權，但議員們強調，呢啲外交地位係喺香港唔受中共統治嘅前提下授予嘅。佢哋表示，「香港曾是壓迫之海中嘅自由堡壘，而家卻被中國共產黨嘅傀儡統治」

報道指，港府肆意拘留政治異議人士，速度僅次於白俄羅斯、古巴同緬甸等獨裁國家。被港府打壓嘅政治犯包括數十名民主派活動人士，包括《蘋果日報》創辦人黎智英、前香港眾志秘書長黃之鋒、記者何桂藍同前支聯會主席及前立法會議員李卓人等。議員們提到，呢啲被不公正關押嘅政治犯當中，有四分之三唔到30歲，包括159名未成年人，「佢哋唯一嘅罪過就係企出嚟反對中國共產黨」。

議員批評，香港駐美機構對呢啲民主派人士施加迫害，呢啲辦事處唔只喺美國為北京宣傳，為共產主義嘅壓迫辯護、掩蓋事實，佢哋仲協助中共監控流亡美國嘅香港活動人士，「美國唔應該授予一群共產主義間諜外交特權，這必須停止」。

商務及經濟發展局長丘應樺12月初喺一個電台節目表示，經貿辦一直秉承工作守則，喺商貿、文化同教育等方面同當地政府、智庫同民間團體等溝通，冇違反規定，唔接受「任何無理指控」。佢仲提到，美國同香港嘅貿易順差過去10年有超過2800多億美元，兩地如果失去官方對口，情況會非常不理想。

與此同時，中國憲法權威學者陳端洪日前在一場研討會上提出，香港要「由治及興」，其中一個方向是「與英國和美國修和，重振國際聲譽」。前任中國僑聯副主席盧文端也表示贊同，佢指出香港原本應該係國家處理與西方世界關係嘅緩衝地帶和橋樑平台，依家卻成為對美「鬥爭前線」，「這是中央和港人都不願見到的」。

不過《信報》今（13日）發表社評，表示「棘手之處在於，縱使香港願意修和，美國未必善罷甘休」，並提及魯比奧同史密斯聯合撰文敦促盡快關閉香港駐美經貿辦一事。社評最後稱，「鬧翻很易，修和不能一蹴而就，且看港府如何思維與施為」。《I》