美國總統拜登同中國國家主席習近平上個月會面後，雙方同意恢復軍事高層往來，但至今已過去一個月，美國國防部多次嘗試聯繫中國軍方，都冇收到任何回應。

美國國家廣播（NBC）獨家報導，喺11月16日喺美國加州三藩市舉行嘅「拜習會」期間，美中雙方宣布達成恢復直接軍事對話或熱線嘅協議，被認為係「拜習會」所取得嘅代表性成就之一。美國總統拜登稱呢個協議「至關重要」，表明佢同習近平「取得真正嘅進展」，又話：「我哋又返到咗直接、開放、明確、直接嘅溝通。」

美國官員表示，「拜習會」後，五角大廈官員開始尋求同中國國防部展開接觸，以重建已有數十年歷史嘅軍事溝通管道，並安排有關海上安全嘅會談。美國官員亦讚揚恢復《美中海上軍事安全磋商機制》（MMCA）係拜習會嘅重要成就。據2名美方高級國防官員透露，佢哋希望喺出年某個時候舉行海上安全談判。仲有美國高級官員向《日經亞洲》表示，華府希望同中國舉行武器控制會議，並設立飛彈發射通知機制。

美俄於1988年冷戰期間簽訂飛彈發射通知機制，要求兩國通知對方有關戰略飛彈發射計劃，例如洲際彈道飛彈（ICBM）同潛射彈道飛彈（SLBM），目的係要告知對方即將發射嘅飛彈唔係秘密嘅核打擊。

雖然美俄關係因為俄烏戰爭而變得緊張，但俄羅斯喺進行呢類飛彈試射時仍然會事先通知美國，突顯出就算係克里姆林宮都認同避免誤判同意外反應嘅重要性。

但係，中美之間嘅實情就可能未如拜登或者美國官員所講嘅咁樂觀。據3名美方高層官員透露，喺拜登宣布佢同習近平同意恢復美中軍事直接溝通近一個月後，五角大廈官員多次試圖聯絡中國國防部官員，但冇得到任何回應。

中國一直將切斷軍事溝通作為施壓手段。喺美國眾議院前議長佩洛西（Nancy Pelosi）去年8月訪問台灣後，北京當局就切斷咗同美軍嘅直接軍事接觸。

一名美國高級官員表示，中方對恢復軍事交流一直「行動緩慢」，美軍喺各個層面都未能成功接觸到解放軍官員。美國官員警告，美中之間武裝部隊缺乏溝通係危險嘅，美國國防部發言人表示：「國防同軍事領導人之間嘅實質對話是無可取代嘅，開放嘅溝通管道對於確保競爭唔會變成衝突至關重要。我哋致力於實現總統嘅優先事項，將盡可能分享更多訊息。」拜登喺上個月嘅演講中都提到，「意外總係起自於誤解而產生」。

另外，美方亦表示呢次拜習會達到嘅「共識」仲包括阻止芬太尼從中國流向美國。之後，中國國家禁毒委員會辦公室都發布咗一個通告，要求阻止毒品運送到美國。但係，到而家為止未見中方有打擊芬太尼製造同運輸嘅實際行動。

中國係美國芬太尼嘅最大來源地。之前美中禁毒合作有時進行有時中斷，但芬太尼依然源源不斷咁由中國運送到美國。美國每年有數萬人死於芬太尼。《I》