而家港官「言必稱祖國」，當然醫療領域都要同內地接軌。醫管局正打算重啟醫院認證計劃，「推動大灣區醫院評審及醫療質量安全達至同質化，以及與國家醫療衞生服務體系接軌」，又要修例免試輸入護士，希望解決護士荒嘅問題。

根據立法會嘅《新聞公報》，醫務衞生局局長盧寵茂11月29日回應立法會議員陳學鋒嘅提問，話醫管局將會重啟醫院認證計劃，並會用《國際醫院評審認證標準（中國）》（2021版）（簡稱：「中國版評審認證標準」）作為標準，放棄之前長期沿用嘅國際標準。

2020年12月，深圳市衞健醫院評審評價研究中心喺深圳市衞生健康委員會指導下成立，該中心聲稱根據國際醫療保健品質協會嘅標準原則，結合國家醫院三甲評審標準嘅特點，制定咗一套「融合國際同國家標準」嘅《國際醫院評審認證標準（中國）》（2021版）。立法會公報話，該標準已成功獲得國際醫療保健品質協會嘅標準認證。

盧寵茂話，為咗配合10月發表嘅《施政報告》嘅要求重啟醫院認證計劃，醫管局將會喺2023至2024年度喺香港東區尤德夫人那打素醫院同威爾斯親王醫院採用「中國版評審認證標準」。

盧寵茂又話，醫管局已經成立工作組指導公營醫院用「中國版評審認證標準」來推行醫院認證計劃。而喺私營醫院方面，已經有私家醫院表示有意用「中國版評審認證標準」開始醫院認證評審工作。國際上，醫院評鑑通常用澳洲嘅澳洲醫療服務標準委員會同美國嘅國際聯合委員會等做評審標準。

與此同時，醫務衞生局昨（7日）也向立法會提交修例草案，建議新設「特別註冊/登記」、「有限度註冊/登記」護士，以及「暫時註冊或登記」護士。前兩類護士能豁免考取執業試，每次限期3年。

其中，「特別註冊」制度嘅申請人必須喺香港以外地方取得相關專業資格，且有關課程內容大致同護士管理局認可嘅正式註冊或登記訓練課程比擬，之後要有最少3年喺診所或醫院工作嘅全職臨床經驗，喺香港機構工作不少於5年，並被評為良好及勝任才能轉為正式註冊。法例今（8日）刊憲，下周三首讀及二讀。 

黨媒《文匯報》引述香港公共醫療護士協會主席江穎聰表示：「內地一些護理學院的素質也很高，培訓合格的護士完全可以勝任來港工作」。

不過江穎聰都話，希望政府明確規定輸入護士嘅標準，以及堅持由護士管理局把關，以確保註冊護士質素，並建議引入嘅護士需要符合一個同香港類似嘅實習時數標準「才能確保所有註冊護士合乎香港標準」。《I》