點名田北辰、謝偉俊等人「軟對抗」? 李家超:故意說政府只重國安不管其他「荒謬」
點名田北辰、謝偉俊等人「軟對抗」? 李家超:故意說政府只重國安不管其他「荒謬」

自從北京強推《港區國安法》以嚟,香港經濟地位一落千丈,近期更被唔少內地網民戲稱為國際金融中心遺址,就連唔少建制派政治人物都睇唔過眼,直言港府只重國安,忽視經濟。估唔到當局非但唔反省,仲話呢啲嘅人係「軟對抗」。

    

特首李家超於港台《盤點政策》中表示,社會上出現嘅軟對抗,包括稱政府只重視國家安全而不理會其他議題,形容說法荒謬;佢強調政府認真及積極看待批評,但有人假借經濟、住屋等民生議題作軟對抗,令人不易察覺。

    

李家超表示,政府絕大部分政策都與國家安全無關,又話政府同個人都有盲點,「你去話畀我哋聽,邊啲嘢要做得好啲,我係以結果為目標,我係擁抱你添。」佢批評,有人假借民生議題作軟對抗,強調仍然有人針對國家嘅發展,提出對個人或行業嘅制裁,「刻意令到你不成功」,又話外國勢力喺港培養咗「代理人」,唔會認為呢啲人或事已經喺港消失,話大家都會有警覺。

    

翻查紀錄,倘若按照李家超嘅定義,包括立法會議員田北辰、謝偉俊、江玉歡,同中原地產創辦人施永青等人都屬於「軟對抗」。以謝偉俊為例,佢11月喺立法會上就曾經話近年香港傾斜國安,敦促當局「政治減辣」 。

    

謝偉俊當時話,愈來愈多朋友認為近年香港太偏重喺國安議題,令從商者有壓力,惹起好多唔必要制裁。佢表示當《基本法》第23條完成立法後,「呢個或者係癡人說夢話啦吓,廿三條後唔需要國安法喇」,國安法條文「較辣」嘅條文可被《基本法》第23條取代,喺政治上「減辣」。

    

不過佢嘅呢番講法隨即遭到保安局局長鄧炳強駁斥。鄧炳強稱國安法係全國性法律,《基本法》第23條「唔會亦唔能」取代全國性法律,《基本法》第23條同國安法會相輔相成。佢又話有啲人覺得香港「好似好咗啲,唔好成日講國安法啦」,佢強調唔同意嗰個意見,「唔係刻意講,唔係刻意嚇市民,而係有必要居安思危」,因為2019年香港遭受「血嘅教訓」。

    

鄧炳強當時又話,部分人覺得香港「唔使立國安法,唔使立廿三條,國安法取消咗佢啦,香港都無嘢啦」,佢話嗰種諗法「其實好危險」,又話有人利用借口話國安法影響商界,游說「唔好再用國安法拉人啦」,都係錯嘅想法。佢強調國安法「對經濟只會有好嘅幫助,唔會有唔好嘅幫助」。《I》

發佈時間: 2023年12月06日 13:56
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.