中槍「健仔」現身TVB國安節目「懺悔」  網民:似足大陸招認片
中槍「健仔」現身TVB國安節目「懺悔」 網民:似足大陸招認片

2019年10月1日反修例事件期間,中五學生(現22歲)曾志健「健仔」喺荃灣遭警員近距離以實彈擊中,佢早前因承認暴動及妨礙司法公正等, 被判監 47 個月。TVB一個由警方協助製作嘅國安法節目《有法安國》,昨(4日)播出曾志健嘅「懺悔」訪問。佢喺節目中「呼籲」觀眾避免被人煽動同唆擺。對此,有網民直言「個個都知道咩一回事」。

    

《獨立媒體》今日報道,《有法安國》係由警務處協助無綫電視拍攝,一輯共12集,由11月27日至12月12日,逢星期一至五晚上7時30分喺翡翠台播出。當局指節目旨在加強市民對國安法嘅認識、糾正市民對法例嘅錯誤認知,同埋增強市民對維護國安嘅認同。

    

節目首集名為《香港國安法》,第二至五集分別為顏色革命、英國國安法、新加坡國安法,同埋美國嘅國安法例,每集全長2分鐘,內容均圍繞2019年反修例,同埋其他國家國安法實施具體情況。

    

至於星期一(4日)播出嘅第六集,曾志健就係主角,佢喺懲教署嘅院所內接受訪問。喺2019年反修例期間,10月1日發生荃灣衝突,當時年僅18歲嘅曾志健被警方開槍射中胸口,及後被控暴動、襲警及妨礙司法公正罪,佢同3名涉另案嘅青年被安排喺酒店等藏匿一年半。案件喺今年10月18日喺區域法院判刑,曾志健就暴動及襲警罪被判監禁42個月,妨礙司法公正罪則判監禁11個月2星期,合共監禁47個月。

    

喺節目中,曾志健以第一身稱:「因為當時個氛圍好似越嚟越激烈,所以見到個個都咁樣做嘅時候,就越行越前。」旁白續提到,「阿健」由單純上街支持,到及後有人向佢提供裝備,「參加非法集結變成一種慣性」至2019年10月1日,「阿健」喺荃灣參加暴動期間中槍被捕。而喺保釋期間,「阿健」透過同案被告認識一名中間人,被對方遊說棄保潛逃,佢遂將積蓄10萬港元交予對方安排。

    

曾志健喺訪問中提及喺等待外逃期間嘅經歷,包括冇電、糧食不足同埋冇床瞓,並試過喺轉移藏身地點時躲喺紙箱裏,「被人當貨物咁樣運」。旁白指中間人對佢嘅承諾多次落空,最後一次更稱會安排曾志健同其他人,由北潭涌上船離開香港,結果被警方截獲拘捕,及後承認暴動、襲警等罪名,今年入獄被判47個月。

    

喺節目末段,曾志健稱:「有參加過一啲沿途有『理』嘅更新計劃啦,令到我學識咗點樣去管理自己嘅情緒嘅技巧囉。做事之前要諗清諗楚,避免唔好俾人煽動同埋唆擺。最後承擔後果嘅,其實就只係我哋自己同埋屋企人。」

    

喺連登討論區上,唔少網民對咁樣嘅節目冷嘲熱諷。有網民話:「周庭出來之後,呢類宣傳片就已經無哂用,個個都知道咩一回事」、「當香港人on9?」、「咁岩比周庭踢爆左」、「似足大陸D招認片」。

    

亦有網民分析:「肯定係用加減刑期嚟威脅佢咁講,知佢個身體狀況好難捱足47個月就特登逼佢去洗白班賤畜」、「曾志健稱:『….最後承擔後果嘅,其實就只係我哋自己同埋屋企人』最後一句真係重點,又係要搞人六親,乜都要玩到誅九族咁款,睇吓而家邊個殘暴啲?明明淨係可以呃到班小朋友,點解可以賤撚到咁嘅地步㗎?真係喊咗出嚟,屌」等。《I》

發佈時間: 2023年12月05日 13:37
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.