世界大戰前夕? 中俄「這一拉美盟友」集結軍隊準備入侵! 照抄普京劇本通過公投擬併吞鄰國2/3領土
世界大戰前夕? 中俄「這一拉美盟友」集結軍隊準備入侵! 照抄普京劇本通過公投擬併吞鄰國2/3領土

一向同中國、俄羅斯友好嘅委內瑞拉獨裁者馬杜羅(Nicolas Maduro),早前推動所謂「公投」徵詢國民有關委內瑞拉應否「收復」(或「吞併」)鄰國圭亞那(Guyana)三分之二嘅領土。馬杜羅當局同日宣稱公投獲得超過95%支持通過。委內瑞拉軍方隨即派出推土機開始喺邊境叢林清理出道路,更表明係為軍事行動後勤需要,被認為係為入侵蓋亞那做出準備。

    

《香港01》報道,公投相關嘅爭議土地係圭亞那國內埃塞奎博河以西、分別同委內瑞拉同巴西接壤嘅「埃塞奎博」(Essequibo),面積相當於160個香港(近16萬平方公里),當地人口約有12萬5000人,蓋亞那總人口數則大約80萬。

    

呢個地方早喺19世紀中後葉發現金礦,仲有鑽石、鋁等天然資源。2015年,石油巨頭埃克森美孚(ExxonMobil)更喺該訂延伸出去嘅經濟專屬區發現離岸石油同天然氣田,蘊藏110億萬桶原油。原油生產使得人口只得80萬嘅圭亞那GDP爆炸式增長,去年增長率達到62%,本年預計增長37%。

    

該地自19世紀以來,一直係委內瑞拉同圭亞那(當時係英屬圭亞那)嘅長年領土爭議所在。19世紀初,委內瑞拉從西班牙獨立後,埃塞奎博附近嘅土地由荷蘭交到英國手中,由後者合併到英屬圭亞那之中。19世紀中葉,委、英有關埃塞奎博嘅主權爭議漸起,委內瑞拉利用當時美國反對歐洲強權介入美洲嘅門羅主義要求美國主持公道。

    

1895至1899年,美國施壓英國接受國際仲裁,仲裁庭由兩位支持委內瑞拉嘅美國法官、兩位英國法官同一位俄羅斯法官主持。最終,法庭將大部分爭議領土判給咗英國。當時,委內瑞拉同庭上嘅美國法官都表明不滿判決,但各方大致上都遵守咗判決。

    

到咗1949年,美國揭出原來當年庭上嘅俄羅斯法官同英方暗通款曲,重燃咗委內瑞拉嘅主權要求,最終喺1966年圭亞那獨立之際同委內瑞拉達成咗《日內瓦協議》,承認埃塞奎博主權爭議存在。委內瑞拉唔承認1899年仲裁,但表明兩國要和平解決埃塞奎博主權問題。

    

此後,國際社會大多承認埃塞奎博為圭亞那領土,而圭亞那對當地都有實質管治權。雖然委內瑞拉一直以來都冇以武力試圖「收復」(併吞)埃塞奎博,但委內瑞拉嘅教育制度長年將埃塞奎博定義為委內瑞拉不可分割嘅一部分,連痛恨馬杜羅政權嘅反對派,都冇任何反對呢項主權主張嘅聲音。

    

2023年12月3日嘅委內瑞拉公投,包括5個問題,要求選民表態支持廢除1899年仲裁結果、只以1966年《日內瓦協議》為唯一解決埃塞奎博主權問題嘅法律文件、唔承認國際法院嘅管轄權、以所有合法途徑反對圭亞那單方面處理相關海域,以及支持成立埃塞奎博州,給予該地現有同未來人口委內瑞拉國籍,並由委內瑞拉將該地併入委內瑞拉領土地圖中。

    

雖然美聯社、路透社等媒體觀察到票站選民寥寥,但馬杜羅當局則指投票人數至少有1,050萬(近五成投票率)。而上述5個提問,一如所料,都得到超過95%嘅壓倒性支持。

     

圭亞那總統阿里(Mohamed Irfaan Ali)表明,埃塞奎博嘅每一吋都屬於圭亞那,聲言會保衛國土。蓋亞那外交部長陶德(Hugh Todd)告訴法新社:「我哋必須始終保持警惕,當然我哋需始終處於高度監控。雖然我哋唔認為委內瑞拉總統馬杜羅會下令入侵…但佢能做一啲好難以預料嘅事。」《I》

發佈時間: 2023年12月05日 15:34
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.