中國內地支原體肺炎感染大爆發，隨著中港兩地來往頻繁，近日本港感染個案也正大幅增加。對此，醫務衞生局局長盧寵茂回應稱，上呼吸道感染不單係內地問題，而係全球問題，港人外遊都有機會感染。黨媒就「咁啱得咁橋」大肆報道歐美多國肺炎肆虐嘅情況，仲話可能會「傳到衞生基礎設施薄弱嘅非洲產生嚴重後果」。

香港大學兒童及青少年科學系臨床教授葉柏強表示，今年1月至7月，相關確診個案唔多，每個月大約有幾宗至十多宗個案；但自8月開始嘅呢幾個月，每月都有超過一百宗個案。佢話，除咗有大陸旅客來港，亦有經常來往內地小朋友同家長，好容易將內地爆發嘅病毒傳播來港，已經留意到社區個別病毒嘅感染個案正大幅增加。

醫務衞生局局長盧寵茂2日出席活動後見記者，被問到本港有冇機會出現內地嘅嚴重呼吸道疾病（支原體肺炎）、會唔會喺邊境採取措施防止傳入等。盧寵茂表示，上呼吸道感染冬季會有，本身香港都有，呢個唔係純粹內地問題，係全球問題。港人外遊都有機會感染。

對於盧寵茂辯稱，上呼吸道感染唔單係內地問題，而係全球問題。有網民表示，之前大陸隱瞞沙士疫情，導致香港299人死亡；2019年年尾，大陸再度隱瞞新冠疫情，導致疫情全球大爆發，香港累計死亡人數破萬；大陸唔輸出，香港安全，全球安全！仲有網民感嘆，「盧寵茂為咗表忠，咩都講得出口！睇嚟香港疫情好大機會被掩蓋。」

唔單止係咁，黨媒《文匯報》今（4日）以標題「歐美肺炎肆虐 白肺病例激增」進行報道。黨媒稱，「今年入冬以來，歐美多國受到肺炎肆虐，出現急性呼吸窘迫綜合症，俗稱為『白肺綜合症』嘅肺炎病例激增。專家警告隨着年底嘅出行高峰期來臨，肺炎疫情可能蔓延到整個歐洲和北美，公共衞生系統脆弱嘅非洲，料成為肺炎疫情的下一個爆發地點。」

報道最後稱「令人擔心的是，非洲的衞生基礎設施薄弱，在歐美地區並不致命的肺炎，到了非洲可能產生嚴重後果」，似乎已經為可能席捲全球嘅「白肺」疫情，提前編寫好「責任全在歐美」嘅劇本。《I》