美國總統拜登同中國國家主席習近平睽違一年後再次會晤，雙方皆反應正面。拜登表示「取得實質進展」。而中國外長王毅就形容「談得很好」，全面又深入，係具有戰略意義同深遠影響嘅元首峰會。不過俄爹就「唔抵得」喇！俄副外長稱，美國發起挑釁行動「對象可能不止一個，我認為北京也在其中」，又話希望「繼續深化互動」中俄關係，共同應對美國挑戰云云… 挑撥意味相當濃厚。

綜合多間媒體報道，兩位元首會晤過程相當融洽。會談開始之前，拜登對習近平表示，「我覺得最重要嘅係，領導人之間要互相理解，唔好有誤解或者係溝通唔順利嘅情況。」拜登話，佢同習近平一定要確保美中之間嘅競爭唔可以變成衝突，仲要負責任噉管理競爭，佢仲補充話佢之前同習近平嘅會面係「坦白、直接，對雙方國家都有好處嘅」。

拜登亦都回想起往事，提到佢做副總統嘅時候，已經同習近平建立咗聯繫，「我哋認識好耐喇，雖然我哋之間唔係成日都意見一致，但咁都唔出奇」，佢仲話「就好似平時噉，面對面嘅討論係無可取代嘅。我一直都覺得我哋嘅討論係直接同坦白嘅。」

拜登話，坦白嘅交流對雙方同埋對全世界嚟講都係期望，領導人有責任為自己人民共同努力。佢仲提到雙方面對嘅全球挑戰，包括喺氣候變化、打擊毒品販運同人工智能等問題上都需要共同努力。

習近平亦都回想起以前嘅事，話「來到呢度，諗起當年做中國國家副主席嗰時，您（拜登）嚟中國訪問嘅時候。嗰時我哋都有開過會談，嗰已經係12年前嘅事喇。」習近平話，佢仲記得同拜登當時嘅互動，畀佢帶嚟咗好多啟發。

美國官員話，拜登同習近平仲講咗吓佢哋嘅太太。拜登同習近平嘅太太彭麗媛嘅生日都係11月20號，佢請習近平幫手祝彭麗媛生日快樂。但係美國官員話，習近平對此覺得有啲唔好意思，承認因為工作太忙，忘記咗佢太太嘅生日就快到。

拜登同習近平喺會談期間一齊食午餐嗰陣，拜登拎出手機畀習近平睇，問佢：「您認唔認得呢個年輕人啊？」習近平答：「認得啦，呢個係我38年前。」原來，拜登手機上面展示嘅係習近平1985年做河北省正定縣委書記嗰陣訪問舊金山嘅一張相。拜登話：「您一啲都冇變！」現場就突然響起一陣笑聲。

一片歡樂嘅氣氛之後，拜登稱今次會談為穩定美中關係帶嚟「重要進展」，係兩國「最具建設性、最富有成果嘅一次會談」，雙方就恢復軍事接觸、遏止類鴉片麻醉藥品芬太尼販運等達成協議，又話兩人日後會透過「拿起電話」解決歧見，而唔係讓兩國滑向衝突邊緣。

習近平就話，美中關係係世上最重要嘅雙邊關係，佢同拜登「對兩國人民、對世界、對歷史肩負重大責任」。又話「對於像中國和美國這樣的兩個大國來說，互相背棄並非選項，一方改造另一方，是不切實際的，且衝突對抗會為雙方帶來難以承受的後果。」

中美關係嘅緩和，睇喺俄羅斯當局眼中就相當不是滋味喇！俄國官媒衛星通訊社報道，人喺伊朗德黑蘭嘅俄羅斯副外長里亞布科夫表示，俄方正分析拜登和習近平會晤成果。

里亞布科夫首先就先潑冷水稱，「美國同中國處於一個對話同相互關係嘅困難階段」，跟住話「美國方面提咗好多要求，呢啲要求根本就冇道理。好多條件同要求都係憑空想象出嚟嘅，企圖喺唔同領域，包括經濟同高科技領域，限制正常嘅工作。喺討論區域問題上，華盛頓同北京嘅態度進展都非常不易。」佢話，雖然中美重啓軍控對話係有益嘅，但又稱「世界戰略穩定總體情況不會改變」。

里亞布科夫講，「美國同埋佢哋喺東北亞地區嘅啲親密盟友嘅行為引起咗愈來愈多問題，實際上係唔斷加劇緊張局勢，隨時會爆發危機。華盛頓嘅呢啲挑釁行動嘅目標可能唔止一個，我覺得北京都包括喺內。對於呢啲信號同美國人嗰套慣用嘅局勢升級模式，我哋都清楚睇到。我哋明白其中嘅內在邏輯，可惜華盛頓就係唔肯放棄呢一系列無完無了嘅對抗，佢哋希望即使贏唔到，至少都可以喺國際事務上加強自己嘅主導地位同霸權主義。」

佢同時話，「國際社會上有唔少清醒嘅政治家，仲有包括一啲國家喺內嘅好多有影響力嘅團體，佢哋正積極抵抗呢種狂妄嘅做法」，又講「我哋都係呢啲團體之中嘅一部分，同中國一齊。我哋將會加深團體之間嘅協作。長期以來一直喺協同努力制定同推進相關模式，以解決美國挑起嘅區域性以及更廣泛範圍嘅緊張局勢。」

與此同時，俄羅斯駐中國大使莫爾古洛夫亦都表示「俄中喺安全領域嘅合作尤為重要」。佢表示，俄羅斯聯邦武裝力量同中華人民共和國解放軍舉行聯合演習有利於維護地區同世界嘅「和平與穩定」。又指相信「喺新嘅世界現實中，俄中喺雙邊同國際議程各個領域嘅關係，只會加強並充滿新嘅內容。」《I》