東非島國馬達加斯加嘅政局連日嚟動盪不安，總統拉佐利納（Andry Rajoelina）面臨由年輕示威者發起、被稱為「Z世代」嘅大型抗議浪潮，壓力爆煲。繼有軍方人員倒戈加入抗爭後，拉佐利納於13日喺社交媒體度發表講話，聲稱自己多次險遭暗殺同政變，為咗保命，已經「轉移到安全地點」。不過，佢態度強硬，強調會繼續履行職責，唔會辭職。

根據當地反對派領袖同外國外交界人士透露，其實拉佐利納喺12號日已經秘密坐法國軍方嘅CASA運輸機離境。有軍方消息人士更爆料，話架法國陸軍嘅飛機喺聖瑪麗機場落機，五分鐘後就有直升機接載「乘客」上機，呢個乘客就係拉佐利納本人。

呢位現年51歲嘅總統，透過Facebook向全國發出視像講話，否認自己係「著草」，堅稱自己係為咗「保命而暫時撤離」，仲話：「9月25日以嚟，有人多次想暗殺我，甚至試圖發動政變。有啲軍方人員同政客密謀想殺死我。」佢重申，解決問題嘅唯一方法，係「遵守國內現行嘅憲法」，表示唔會「容許馬達加斯加被摧毀」。外交消息人士其後就話，拉佐利納企硬，拒絕落台。

今次大規模抗議最初係由當地嘅年輕人發起，佢哋被統稱為「Z世代」示威者。示威起初係針對國內長期嘅停電同缺水等民生問題。馬達加斯加係全球最貧困嘅國家之一，人口中位數仲細過20歲，有四分之三嘅國民都生活喺貧窮線以下。據世界銀行數字，該國人均GDP自1960年獨立以嚟跌咗四成半。

隨住抗議規模不斷擴大，示威訴求迅速升級，由單純嘅民生不滿，變成要求打擊貪污、改善施政同要求拉佐利納即刻辭職嘅反政府運動。首都安塔那那利佛嘅廣場聚集咗成千上萬嘅民眾，高呼「總統落台」。聯合國數據顯示，自抗議爆發以嚟，示議者同安全部隊嘅衝突已經導致至少22人死亡。

令局勢更加嚴峻嘅係，部分軍隊單位已經譁變，加入支持抗議群眾。有報道指，喺上周末，首都南部一個軍營發生叛變，部分精銳部隊嘅士兵呼籲其他同僚唔好服從命令，轉態支持青年抗爭。諷刺嘅係，呢個部隊曾經喺2009年幫手拉佐利納發動政變上台。

雖然拉佐利納仍然唔肯退讓，堅持要根據憲法化解危機，但反對派領袖已經表明，一旦總統職位出現空缺，將會由參議院議長暫代職務，直至舉行選舉。隨住總統避走、軍方分裂，呢場由Z世代引爆嘅政治風暴將會點樣收科，暫時仲係個謎。