中華人民共和國社保新規今日正式上路。最高人民法院上月一日發布新解釋，由九月一日起正式落實社保新例。根據新規定，任何僱主同打工仔為咗規避繳交社保而簽嘅協議，一律當作無效。其中第十九條更訂明，如果公司冇依法幫員工交社保，打工仔可以根據《勞動契約法》終止合約，並要求公司賠償。呢條新規例喺民間畀人叫做「強制社保」。

呢條新法例出台之後，有評論認為只會加劇「底層互害」嘅情況。因為即使勞資雙方私下協議唔交社保，都難擔保員工有朝一日唔會反水。畢竟涉及利益，對打工仔嚟講有利無弊，呢種做法根本係考驗人性，而人性係最經唔起考驗嘅。所以，僱主為咗自保，點都會選擇幫員工交社保，但多數都會喺員工份糧度扣返或者直接減薪，搞到打工仔都無着數。呢種做法就好似中共權力架構咁，欠缺監督制衡，卻妄圖以道德防範貪腐濫權，根本係癡人說夢。

近年中國經濟持續下行，唔少中小型企業都經營困難，好多公司本來都冇幫員工交社保。而家「強制社保」新規一出，唔少老闆都無晒辦法，選擇減員工人工、炒人，甚至索性執笠躺平。

浙江義烏有間日用品廠嘅老闆話，自從上年下半年開始，生意就越來越差，呢幾年幾乎都冇賺錢，收支僅僅持平。但上個月新頒布嘅「社保新規」，就成為咗壓死駱駝嘅最後一根稻草。佢最後決定清退晒所有工人，結束營業。

俗語話「上有政策，下有對策」。為咗降低人事成本，有啲公司就轉用「外包」、「派遣」呢類方式，唔再簽訂正式嘅勞務合同。更有甚者，索性請「退休人士」返工。雖然老人家工作效率未必及得上後生仔，但係好多僱主都寧願請佢哋，就可見社保嘅負擔有幾重。後生仔可能發夢都估唔到，本來已經飽和嘅就業市場，而家因為新法例，僅有嘅工作機會仲可能畀老人家搶走。搞到後生仔就業更難，中年人面臨裁員失業，老人家又冇得真正退休，形成一個惡性循環。

中國社保係「現收現付制」，即係而家交嘅社保費，係直接畀現時已退休人士用。但少子化越來越嚴重，將來打工仔所領取嘅退休金，可能少過自己交嘅錢，甚至可能根本領唔到。反觀公務員體系嘅退休金，依然係好高，而且目前仲未有下調嘅跡象。

有評論話，庫房咁緊張，當局唔係諗住「節流」，反而係向老百姓「開源」。正所謂「再苦不能苦官老爺」，搞到民眾「相對剝奪感」好重。上星期印尼民眾先因為稅收、議員高薪同津貼問題上街示威，情況越演越烈，中共當局都應該有所警惕。