河北邯鄲市一名中學黨委書記被指利用職權之便，誘騙一名 15 歲高一女學生回校練習乒乓波，期間喺辦公室性侵女學生。受害女生事後出現嚴重抑鬱，案件直到其母發現女兒購買避孕藥先至揭發。涉事書記一度想用 20 萬元人民幣「私了」，但被家長斷然拒絕。目前，該名書記已被警方刑事拘留，並由檢察院正式批捕，但相關報道疑因「敏感」被內地媒體全面下架。

據悉，涉案嘅喬某軍係邯鄲市某中學嘅黨委書記，平時對外形象積極，更曾獲得省內校長盃乒乓波賽事嘅獎項，經常同學生一齊練波。受害女生李婷（化名）自細就鍾意打波，喺考入該中學前就已經喺網上關注咗喬某軍。

今年農曆新年期間，正當家家戶戶開開心心過節之際，喬某軍竟然喺大年初五，透過社交平台私訊李婷，叫佢返學校「加操」練波。李婷當時不虞有詐，單純以為係老師關照，點知返到學校後，被對方帶入辦公室。據報，喬某軍喺辦公室內性侵李婷，令原本平靜嘅校園變成咗女孩嘅噩夢現場。

事發後，李婷因為驚恐同羞辱，一直唔敢同屋企人講。但係，原本性格開朗嘅佢，情緒出現咗 180 度大轉變，變得很憂鬱，成日無端端喺半夜三四點大喊，甚至要休學休養。

直到今年 3 月，李母王芳（化名）喺女兒嘅手機入面，意外發現咗購買避孕藥嘅紀錄。王芳當時大驚失色，喺不斷追問之下，李婷先至一邊喊一邊講出當日喺書記辦公室發生嘅慘痛經過。李婷表示，因為擔心懷孕先至瞞住屋企人買藥，幸好最後證實並未懷孕，但心靈創傷已經難以磨滅。

得知真相後，王芳憤而前往學校搵喬某軍理論。面對家長嘅質疑，喬某軍並無道歉，反而第一時間想用錢解決問題。王芳憶述，對方最初開價 10 萬，見王芳唔肯妥協，隨即加碼到 20 萬，要求「私了」呢件事。

「我唔會用仔女嘅身體同佢做交易！」王芳態度堅定，佢直言目前唯一嘅訴求就係要為女醫好憂鬱症，並要讓喬某軍承擔應有嘅刑事責任。王芳隨即喺 3 月 18 日報警。據知情人士透露，喬某軍已於 3 月 22 日被警方刑拘，並喺 3 月 30 日被邯鄲市某區檢察院以涉嫌性侵未成年人罪名批准逮捕。

呢單案喺內地引發極大迴響，內地主流媒體如《中國新聞週刊》曾大篇幅報道，並一度登上微博熱搜榜首。然而，就在消息傳開後無耐，相關報道疑似遭到「維穩」，唔單止原稿被下架，連熱搜話題都被消失。

目前，邯鄲市教育局及涉事學校對外一概表示「唔接受採訪」或稱「由宣傳部統一回覆」。外界批評，官方呢種做法係企圖遮掩校園醜聞，對受害者極唔公平。有網民留言感嘆：「教書育人嘅地方竟然變成淫窟，官官相護只會令下一個受害者出現。」